Ka Khasi Student Union-War Jaiñtia Circle (KSU-WJC) ynne ka sngi da lai paan yutip ko lyngba ka Right To Information na yung krehkaam Directorate Of School Education and Literacy Shillong neibynta wow tip bniah hajrong i kreh ya ka Residential School kawa em ha chnong Pdengshakap Amlarem Sub-Division.
Kam wow pynkynmoo heini wa dang ha kini ki tayaw wa dadep ka seiñ da lai pait ko ya kani ka skur kawa em ha chnong Pdengshakap wei da chem ko wa u Contractor uwa kreh ya ka da kreh khalær ware u ya ka heiwa da chem ko wa boon ki chram ka skur da kaad (Crack) ki wei ki kamra Class leh boon kiwa joo um lut.
Hajrong ini i kreh khalær u Contractor neiliang ka seiñ da paan noh ko da ka RTI na ka chnat puræ puthi hajrong i rukom pynkreh ya kaani ka skur.
Ha kani ka kylli yutip wa da paan lyngba ka RTI toh kawa da soi da u Laitphar Syngkrem, President ka chnat seiñ chirup wa u Lurman Talang uwa man kam u General Secretary yong ka.
“Ka seiñ ym kwah ko wa ya i kreh ka skur u leh khalær wei wow kreh tangdep donhi ya ka,” da ong u Laitphar Syngkrem deiwa pynrap leh wa ka seiñ daw booddien ko yeini waroh sam chaphrang khnang wa ym sepai ka poisa ki paidbah.
