Jowai: Kam ka dak wow pynyoo yei sñiawsih hajrong i chah kem u Fr. Stan Swamy uwa naka jylla Jharkhand, ynnin i janmiet hapoh i yahkhmat u Dr. Moses Kharbihthai wa u Richard Syiemiong chirup i krehlang waka All India Catholic Union Jowai Diocese da pynman ki yei thang mombati ha pchem ka MHHS Cum-Multipurpose Hall wada chim bynta da ki paaid wa ngait ka Balang Catholic kynthai wa chynrang chirup i emlang ki phadar wa sister.
Yaka yalang thang mombati ha kani ka janmiet da pynllai da u G. Sten President ka All India Catholic Union Jowai Diocese.
Katkam ki kyntien yahkhmat na u Fr. Gabriel Kharluni, khana u wa u Fr. Stan Swamy toh u bru wa em mynsien yarap yaki bru wa chah thombor i hok yong ki.
Da ong wa i chah kem yong oo toh du neidaw wa lai pynlait u yaki khynnah khynroo wa chah kem khlem daw man-i -por ha Jharkhand kamtæ ka sorkar da pynbaad ko wa da emkti u haki kaam pyntieñ pynsmiej yaka imlang sahlang.
Sa iwi leh da ong wa u Fr. Stan Swamy toh uwi wa jooh yarap yei hok kynti ki bru ri-loom wa chah thombor ha Jharkhand khamtam ya kitu ki wym nood u mih chakhmat, neitæ i daw ka sorkar da pharep noh ko ya oo wa emkti u wa ki kaam pyrchah yaka aiñ ha katai ka thaaiñ.
U Fr. Gabriel Kharluni da kdaw haroh u hajrong ini deiwa ong “Ka Jharkhand haap ko haka 5th Schedule heiwa ki khlieh pynlai chnong em ki ka bor wow pynemkaam hei bichaar khadar haki chnong ka thaaiñ wei kiwi wym ye ki wow thombor yei hok yong ki. Tangwa kattæ leh ki heh spah ki bor sorkar thmu bait ki wow thombor neidaw wa ka Jharkhand toh kawa mahajon haki mar poh khyndaw, khlem kheiñ de yaka aiñ”.
Heijooh i por ka thong yong kani ka thang mombati leh toh yow dawa pynlait noh ya oo chisyndon.
Da yoh leh i klam na u Mutchwa Thabah President ICYM, u Terence Sawian, u Fr. Aibor Nongbah wa kiwi.
