Shillong: Ki dkhot ka Khasi Students’ Union (KSU) ynne ka sngi da lai wah ki ya ki Banner ha kylleiñ ka sor Shillong deiwa thoh ya ki kyntien wa ong wa ki jaitbru Bengali ha Meghalaya waroh toh kiwa na Bangladesh, wei ini i wah Banner da sdang i nadooh na Motphran ter ter cha Police Bazar hadooh ha Laitumkhrah wa kiwi ki thaw.
Da thoh leh ya ki kyntien wa ki Bengali toh u sangeh noh ki wow thombor ya ki bru ha ka jylla Mizoram, Tripura wa Meghalaya, wei da wah leh ya ki Banner heiyatoh wa ka CAA deiwa ong wa toh kawa thmu wow tynyap yaka jaitbru wei ka seiñ da dawa ko wow pynkrehkaam noh ya ka ILP ha ka jylla Meghalaya.
Ha Ri-Bhoi ka KSU North Khasi Hills da pynman ko ya ka yalang ha 20 mer ka Ri Bhoi District wow yang yei wan ki heh ka All Bengali Youth & Students Organization (ABYSO) kiwa thmu wow lai cha Ichamati heiwa ka sorkar ym em u ebor ko ya ki (ABYSO).
Ha Sohra won ka KSU South Khasi Hills da yalang ki wow yang ya ki bru Bengali hapoh ka seiñ ABYSO kiwa thmu wow lai cha Ichamati, deiwa ong wa ini i pyrchah toh neidaw wa kwah ki wow wan luchia yeiwa jia ha kani ka chnong wei ki dkhot ka seiñ da man ki kiwa da pynkhreh lada em kam ini i wan luchia.
Neiliang ki pulit ka Meghalaya won da lai chim noh ki ya kini ki Banner kiwa da wah ka seiñ.
