Ka Hynniewtrep Youth Council Laskein Block Circle da pynsñiaw ko yei kmen wei e khublei ko ya ki Contractor kiwa da ye wow pynchna ya ka yingkieñ Myntang (Rymphum) ha i por wa biang wei kiwa da ye u pynchna du hapoh le bnai kawa ki paidbah ym em yooluti ki wow ye ki u pyndep ya i kreh neidaw wa joor pynthut u slap.
Kamtæ ka seiñ da ong ko wa kamwa tip wa uni u surok toh u budloom yong ka roi ka par hapyrdi ki bru ka thaaiñ Elaka Shilliang Myntang wa ka thaiñ Elaka Raliang heiwa da toh leh i por wow lum wow pynlang wow kit ya u kba na ki bri ki pynthor lyngba kani ka yingkieñ, da i pyndep smat ya kani ka yingkieñ da pynsuk leh ya ki khynnah skur wow ya beh cha ki thaw lai puræ kam cha Mokyndeng, Mowkaiaw wa cha kiwi kiwi.
Kani ka yingkieñ leh da pynlait ko nei wow lai cha kiwi ki luti wa jngai kam na ka chnong Mynsoo, kamtæ ka seiñ da pynsñiaw ko leh yei burom ya u MLA ka thaaiñ u Nujorki Sungoh uwa da chimkhia wow yaklam wa ka PWD hadooh wa yoh smat yaka hukum na ka PWD wow pynchna ya kani ka yingkieñ wei kamjooh da e khublei ya u EE PWD North wa ya ki SDO kiwa da ya chimkhia lang neibynta kani ka yingkieñ Rymphum kawa man sakhiat u budloom ka thaaiñ Elaka Shiliang Myntang waka Elaka Raliang.
Ka kyrwoh na u Kular Skhem Sariang uwa man leh uwa pait yaka thaaiñ HYC Elaka Shilliang Myntang.
