Ka Hynniewtrep Youths’ Council (HYC), da pynsñiaw ko yei mynsien wa chrai hajrong i pynbaad wa i maham ki bru samen wa ki seiñ waphær waphær na ka jaitbru Bengali ya ka jaitbru Ynñiawtrep ha ki sngi wa dadep.
Ka seiñ da ong ko wa nyngkong da kdaw ko yeiwa jia ha Ichamati, Elaka Mawlong ha ka 28 Thohlakhmi uni u snem heiwa ki baar jylla da mih ki da ki spah wow dat ya ki tre jylla heiwa da dooh leh ya iwi i mynsien deiwa ong leh wa ki dur wa ki Video wa poor da che kdar yi wa pynkulmar katwa da kem won du ya ki 8 ngut donhi kiwa emkti heini i thombor.
Da kyntu ko leh ya kiwi ki seiñ na baar wa ymtoh u luchia ki yei kaam pohyung ka jylla neibhah wa hadooh katni ym jooh em iwon iwon i ujor pyrchah namo i leh embor pyrchah ya kiwon kiwon ki niam wa khian paaid (Religious Minority).
Da ong ko leh wa ini i pynkhih ki kattu katni ki seiñ na Assam wa West Bengal ye u toh wa da jan ki Assembly Election ha kini ki jylla wei da pynman kaam Politics donhi yeini.
Neiliang ka HYC da beiñ ko ya u Lat warim ka jylla, u Tathagata Roy ya ki kyntien wa klam u iwa khlem pyrkhat.
Chooh chooh da maham ko ya ka seiñ Legal Rights Observatory (LRO) wa ymtoh u sdang pynchoi yaphær niam ko neibhah i klam pyrchah ya ka Balang Presbyterian toh iwa ym ye wow pdiang neibhah ini daw wanrah i du yei sñiaw yaphær ki niam ha ka jylla wa ka ri waroh kawi.
Heijooh i por da beiñ ko leh yei klam ka Sushmita Dev kawa man ka heh yong ka Mahila Congress hajrong i klam khlem yurim yong ka neibhah wa leh ko yeini du neidaw wa da jan ka Election Assembly ka jylla Assam.
Kani toh katkam ka Wyrta na u Robertjune Kharjahrin uwa man u President ka HYC wa u Roykupar Synrem uwa man kam u General Secretary yong ka.
