U Bharatiya Janata Yuva Morcha Cachar District President u Amitesh Chakraborty, ynne ka sngi da ujor u ha ka Silchar Sadar Police Station pyrchah ya u Khasi Students Union President u Lambokstar Marngar.
Ha kani ka ujor da ong wa haka 21 tarik uni u bnai wa da em yei wah yaki Banner ha Police Bazaar, Shillong kiwa ong wa waroh ki Bengali wa em ha Meghalaya toh ki Bangladeshi wei hap ki wow mih noh napoh Meghalaya.
Da ong wa kini ki jait Banner daw wanrah ko yei sier mynsien ya kitu kiwa ym toh ki Khasi khamtam kiwa klam ya i ktien Bengali hapoh Meghalaya. Da ong leh wa kam kini ki jait jia ym toh iwa thymme ha Meghalaya wei da jia i nadooh u snem 1979 wei yei ini i hikai wow kynchiñ toh iwa da pynpoor da ka Khasi Students Union.
Kamtæ da ong wa ini iwa katni iwa da mih biang iwa wym chngaaiñ haka imlang sahlang toh iwa da e diñ da kam kini ki klam ka KSU iwa da poor cha waroh kawi ka ri ym du hapoh Meghalaya.
Da ong leh haka ujor wa ka Meghalaya jooh man ko kam chibynta ka Assam hadooh 1971 wei chwa ya itæ ka Assam jooh man ko chibynta ka Bengal nadooh ki por warim. Da kdaw leh em boon ki Bengali kiwa klam Nepali, Hindi kiwa sah ha waroh kawi ka thaaiñ North East kawa jooh man leh kam chibynta ka Bengal Province ka British.
Kamtæ da kyntu da pyntip cha ki pulit wa kini ki kaam yong u President ka KSU u Lambokstar Marngar toh u pynsangeh noh chisyndon wei wow leh katkam ka aiñ ka ri neibhah wa kam kini ki jait kaam da jia i nadooh u snem 1979 awjan man i por wa em ka Durga Puja, Diwali hadooh X-Mas yow lait noh ko wow jia neini chakhmat.
