Shillong: Ka Hynniewtrep Achick National Movement (HANM) da rai ko wow ujor pyrchah ya ki bru kiwa pynchit yaphær jaitbru wa kynthup leh ya u Lat warim ka jylla, u Tathagata Roy. Ka seiñ da pynsñiaw ko leh yei sñiawkhia hajrong i leh stiñ yong ka sorkar wow booddien ya i leh yong ki Bengali kiwa na baar ka jylla, wei kamjooh ya i pynbaad ha ka Twitter Account yong u Lat warim ka jylla, u Tathagata Roy.
U Vice President ka HANM, u Kyllang Thongni da ong u wa i thoh yong u Lat warim ka jylla man ko iwa pynchit wow wanrah ya i yaphær hapyrdi ki jaitbru, wei neiliang yong ka seiñ ka dawa ko na ka sorkar wa toh u booddien wow kem syndon leh ya ki bru kiwa pynchit wow wanrah ya i yaphær jaitbru.
U Thongni da ong uwa toh u Vicky Dey uwa sah ha Maharashtra wa ki bru kiwa na Cachar wa na Tripura kiwa da pyrchang wow muchlai ya i chongsuk chongsaiñ ha kani ka jylla, wei ka sorkar toh u booddien ko yow kem ya kam kini ki jaitbru.
Neiliang yong ka HANM daw lai yachem ko ya u Symbood Montri Rangbah ka jylla wa ya u Montri Kaam Pohyung ka jylla wow yaklam ya ini, ha i jooh i por ka seiñ daw pynkhreh ko wow ujor da ka ejahar pyrchah ya u Lat warim ka jylla u Tathagata Roy, neiliang yong ka HANM da booh ko leh i kylli wa ileh kini ki Bengali kiwa na baar kwah ki wow luchlia ya ka jylla.
Uwa yahkhmat ka HANM da kyntu u leh ya ki baar jylla kiwa sah ha kani ka jylla wow mih ki chakhmat neibynta i suk i saiñ khnang wym mih iwon iwon i eh næ sñiawthooh bakla.
Ha i jooh i por ka HANM da kyntu ko ya ki pulit wa ym toh wow sangeh ya i takit hajrong i jia hapoh Ichamati iwa da wanrah ya i khlaad noh yong uwi u dkhot ka KSU na Sohra.
