Haka kyrwoh wa phah da ki 5 ngut kiwa kynthup ya u Chairman wa Secretary chnong ka Dharombosti, Chaklabosti, Bholaganj wa Alubari wa ha ka 24 tarik uni u bnai, u Syiem ka Sohra da khut u ya ki cha ka chnat krehkaam yong oo yow pynman yaka yalang wa sdang nadooh 2 waje i sngi hadooh 5 waje i janmiet yow tip chaphang i eh wa maad ki bru ha ki chnong yong ki.
Tangwa kini ki 5 ngut da pyntip ki wa da chah pynbaad ki wa ki da yachem sop sop ki wa ki bru kiwa na baar ka jylla yow ya sooh buit pyrchah yaki bru ri-loom kamjooh yow pynbood naam yaka jylla.
Da ong ki manda booh ki phang kylli ha ki, da khyrwait da kylleiñ ha itæ i rukom wa da pynkulmar ya ki hadooh wa da man kamwa pynbor ya ki wow ong ya ki ktien wa man pyrchah ya ki bru Dkhar kiwa sah ha ki thaw wa wan ki.
Chooh chooh da pyntip wa u Syiem wa ki bru yono oo kiwa em 25 ngut da riñ Video ki ya waroh ini khlem da yoh bor da ya mynjur, wei hadien won da ah da pynchna ya ini i Video heitæ i rukom yow yoo kamwa kini ki 5 ngut wa kiwi ki Dkhar kini ki thaw toh kiwa leh bakla.
Da kylli leh ya ki chaphang ki 3 ngut kiwa na thaaiñ yong ki kiwa lai yachem wa u Lat ka jylla yow lai e dorkhat heitæ i rukom wow thap ya ki ktien ha ki yow pynyoo wa kini ki 5 ngut ym tip ki iyi iyi leh wa daw lai yachem ki 3 ngut ya u Lat khlem da yaklam chwa wa ki. Wei ini toh i pyrchang yow pynsakhiat wa da em i thmu pyrchah ya ki bru ri-loom hanla kiwa chah thombor toh ki Dkhar tangwa ki toh kiwa emkti ha kini ki kaam.
Ki 5 ngut da ong ki leh wa ha kani ka yalang da pyntip ki wa ki Dkhar ym chah yaki wow seiñ khih ki wei ym e yaki yaka Trading License, heiwa ki da dep ki wow thoh cha u Syiem heiyatoh wa ki NOC wa ym em yoh ki hanla da paan ki boonsien.
Kamtæ da ong ki wa i Video wa da pynpoor ha ki Social Media toh iwa da chna, da ah, da kylleiñ heitæ i rukom wow pynbood naam, pynsih dur ya ki Dkhar kamjooh yow pynsih yei pyrtuid ki 3 ngut kiwa lai yachem wa u Lat. Heiwa hei yong sakhiat ki bru ka thaiñ yong ki da chah pyndik ki hadooh wa ki da ngiah ki yei leh chiliang u Syiem ka Sohra, u President, Secretary ka New Majai Local Exporters Forum kamtæ da kyrpaad ki ya ki 3 ngut wow lai ki cha u Lat ka jylla yow pyntip wa kamwa 4000 hadooh 5000 ngut ki bru da soi ki yaka dorkhat chaphang i eh i khoo wa maad ki.
Chooh chooh da ong wa da kwah ki wow pynche wa ki ym toh ki bru u Syiem lane ki yong ki bru yong oo kiwa leh katkam i mon yong oo, wei smat ki wow ieh yei kaam wa ksoh ki wei ki ym toh ki bru kiwa klam thok wei u chah khut ki kam ki bru wa thok pyn ha ki bru yong ki hi.
Da pynkut deiwa ong wa i Video wa da pynyoor chaphang yong ki toh katkam wa kwah donhi u Syiem wa ki bru yong oo wei ym toh iwa kamwa man sakhiat. Kamtæ da beiñ ki yeini i leh thok deiwa thmu wow murieh yei sakhiat iwa da maad ki Dkhar ka thaaiñ Bholaganj-Icchamati.
Ka kyrwoh na u Subash Roy, Chairman Dharambasti, u Bikash Dutta, Secretary Dharambasti, u Naresh Chandra Singha, Secretary Bholaganj, u Phoni Dutta, Secretary Alubari wa u Adhir Das. Chairman Chaklabosti.
Ya ini i Video ye phi wow pait heini ha wah:
