Ha i miet ka 24 tarik uni u bnai da wan syndet u slap wa ka la’ær wa joor kiwa da neh hadooh kamwa 3 kynta wei neini da pat da oor lut u kba wei ki hali wa em kba dang nei sngi da man madan lut ki.
Neiliang u Secretary ka chnong Daistong u Vestperson Sutnga da ong u wa i chah ktah ki hali toh ha ki kattu katni ki thaw heiwa ki warep na ka chnong em ki kamwa 90%.
Da ong u wa kamwa 30% ki warep na ka chnong da sñiawsih joor ki hajrong ini i jia wei ym kwah de ki wot tang wow lai pait ya ki hali yong ki.
Chooh chooh da ong u wa ha uni u snem nadooh wa wan ki bnai ly’ur ki warep ka chnong da sdang ki wow thung ya ki mar rep wa boonjait nadooh ki jhoor, u saru, u sy’iñ wa kiwi kiwi tangwa da sepai lut ki neidaw u slap ha uni u snem.
Neiliang ki warep wa boon (kiwa ym kwah wow pynmih pyrtuid) waroh ki mar rep ki da man i iwa dooh wa khroo dooh hawa wyrchaw wa ki snem wa dadep.
Da ong ki leh wa iwa jia ya u kba yong ki ha i step ka 25 tarik toh iwa ymye wow pdiang wei iwa da pyndooh mynsien ya ki.
Heiyatoh wa ini neiliang u Secretary ka chnong Daistong da ong u wa boon ki bru ka chnong toh kiwa im deiwa rep kba wei kam ha kini ki por emkaam ki chiboon i yarap.
