Jowai: Ka Indian Red Cross Society, West Jaiñtia Hills District chibynta wow pynkynmoo ya ki paidbah wa chong chnong heiyatoh wow lait nei tyndep i man ha kam ini i por wa em ka khlam COVID-19, da pynman ko i saam mynkna ya ki Mask wa i sabon.
Yeini i saam mynkna ya kini ki tiar da sdang ha kani ka sngi Hat 31 tarik Naichiphaw ha yung krehkaam ka Meghalaya Bharat Scouts & Guides, West Jaiñtia Hills District, wei ya kini ki tiar da saam cha kiwa chong yaw chong haat wa kiwa lai yaw lai haat.
U Ohiwot Laloo, Secretary IRCS West Jaiñtia Hills District hei yaklam da khana u wa ka Indian Red Cross Society hapyrdi i tynjooh kani ka khlam, da leh ko chiboon ki kaam deiwa e i chakri cha ki bru wa chong chnong kiwa dawa u yoh yei yarap ha ki rukom waphær, kamtæ ha kam ini i por won wow pteiñ chooh yei chakri cha ki paidbah, da e mynkna won ko da ki Mask wa i sabon wei ini i leh kamni u man i chibynta ka luti u pynkynmoo ya ki paidbah wym hoi u kheiñstiñ næ tyndep i man ya ki hukum adong wa da booh ka sorkar heiyatoh wow yada nei poor uni u khñiang.
Chooh chooh u Ohiwot da khana u leh wa yeini i saam mynkna ya kini ki tiar daw pteiñ leh u pynman ha kiwi ki chnong ki thaw neitæ kyrsu kyntu u leh ya ki paidbah wa chong yaw chong haat wa kiwa lai yaw lai haat wow chim ki u pynemkam ya ki thaw sait-kti wa da booh da ka Indian Red Cross Society wa ka Meghalaya Bharat Scouts & Guides West Jaiñtia Hills District neibhah i ye u sait langær ya ki kti man i chibynta ka laad wow pynyap yei em u khñiang COVID-19 nei kti yong i.
