Ka ri Australia ha kini ki 24 kynta itæ hadooh ynne ka sngi Bibar haka sien wa nyngkong nadooh ka 09-06-20 ym em wa yoh COVID-19.
Ka jylla Victoria kawa man kam ka thaw wa pyrdi wa sdang i poor kiwa yoh COVID-19 hadien wan ka la-ær wa ar, ym em de wa yoh ya uni u khñiang la ar sngi, kani ka jylla toh kawa da booh hapoh ka Lockdown wa 112 sngi, kawa ye u man leh kawi na ki Lockdown wa jrong dooh deiwa booh leh kiwa khor bha ki kyndon. Kamtæ da yooluti ka chnat i chait i khiah wow puna noh ya ki kyndon ka Lockdown ha ki sngi wow wan.
U Health Minister u Greg Hunt da e khublei u yaki paidbah yeiwa bien ki u ya krehlang.
Kiwa yap ha Victoria da em ki palat 90% na ki 907 ngut kiwa yap na u COVID-19 ha Australia.
Kiwa da dep yoh COVID-19 ha Australia da em ki 27,595 heiwa kiwa chait da em ki 25,336 ngut iwa man iwa duna bha hawa nujor wa kiwi ki ri wa heh.
Ka Australia kawa em kamwa 25 Million ngut ki bru da pynemkaam ko da ki Lockdown ha Victoria deiwa booh ki kyndon wa khor bha yow pyntikna wa ki bru neh ki hapoh yung deiwa pynkrehkaam leh da ka Curfew.
Ha Victoria kawa em leh ka sorbah Melbourne da sdang wow wai yaka suki suki hadien wa ym em de kiwa dang yoh heiwa ki bru da chah yaki wow mih ki napoh yung, u wai ki dukan, ki Restaurant wa kiwi kiwi deiwa chah wow yalang ki bru 10 ngut ha chi thaw.
U Victorian Premier u Daniel Andrews da yaroh u ya ki 6 Million kiwa chong chnong deiwa ong wa la kamni daw ye u lehkmen yaka Christmas kawa jooh.
