Uwi u tre Truck uwa chalan moo na Amlarem Sub Division da ujor FIR u cha u Officer In-charge ka Dawki Police Station, West Jaiñtia Hills neidaw wym yoh laad ki Truck u wow chalan hanla da yoh bor naka SDO ka Amlarem.
Kani ka FIR toh kawa da e da u Luckystar Manner uwa da ong wa hadien wa da dep u wow e ya ki Number Truck wa ki pyrtuid kiwa yah kari yong oo cha ka SDO kiwa da mih leh haka thup ki kari wa chah u chalan tangwa da em won u bru kiwa da leh dei stat yong ki khlem da bood yeiwa phah ka SDO.
Da ong u wa manda poi ka sngi wa toh ki kari yong oo wow lai ki, da phah uiñ biang ya ki deiwa e daw boon jait wei kyllaiñ ktien ya kiwa yah kari yong oo heiwa kini ki bru da leh ki kam ki bru sorkar ki wym e laad yaki kari wei da pynemkaam bakla ki yaka aiñ.
Kamtæ da ong u wa ini i leh toh iwa da tyngkheiñ yaki kyndon SOP wa da pynbna daka sorkar kawa da thoh che wei da batai che wa ya ki kari ym toh wow pynsangeh wei wow pynuiñ yaki kiwa mih na ki thaw wow kit mar wei wow lai bait cha i thaw wa toh u pynhaap katwa kini ki bru won da phah uiñ biang ya ki.
Chooh chooh da ong wa da em leh i khrong poisa na ki Truck iwa da ong u toh iwa man pyrchah yaka aiñ iwa T.30 chi Truck man-ka-sngi wei da pynemkaam bakla yaka poisa wei da man ko leh pyrchah yaka hukum wa da khang wow booh yaki Check Gate ha ki sarok National Highway da kiwon kiwon ki bru.
U Luckystar da ong u wa ini leh yong kini ki bru da ktah ko yei kamai ja-kpoh yong oo cha wa palat hadooh wow pynbiang baam ha yung ha sem waroh kawi, da chem chitom leh wow su wot yaka tulop kiwa yah kari kamjooh ka bai baam yong ki wot hadooh wow su yaka ram (Loan) du neidaw wa leh kini ki bru.
