Kiwa dang yoh COVID-19 ha Europe da ku ki ar chah heiwa hadooh ynnin ka sngi Bibar da em ki waroh 10 Million ngut.
Ha u Naichiphaw ka Latin America wa Asia da poi 10 Million ngut kiwa da dep yoh. Ka United States samen da em ko palat 9 Million ngut kiwa da dep yoh.
Ha Europe da chim por awjan 9 bnai wow poi 5 Million ngut kiwa yoh COVID-19, katwa yaki 5 Million ngut won kiwa dang yoh da poi du chi bnai tam.
Deiwa em 10% ki bru hapoh pyrthai, ka Europe da em ko 22% kiwa yoh ya uni u khñiang na ki 46.3 Million ngut hapoh pyrthai kiwa da dep yoh. Kiwa yap da em ki palat 269,000 ngut iwa man 23% na kiwa da yap na u COVID-19 ha pyrthai kiwa da em kamwa 1.2 Million ngut kiwa da dep yap waroh.
Neidaw wa ku kiwa dang yoh thymme ya u COVID-19, ka France, Germany waka United Kingdom da pynbna ki yaka Lockdown kawa chi bnai deiwa booh ki kyndon wa khor kamwa heipor wa sdang u pynkrehkaam yaka Lockdown ha u March wa April. Ka Portugal da pynman ko yaka Lockdown ha ki kattu katni ki thaw katwa ka Spain waka Italy da pynkhor ki yaki kyndon.
Ka Europe da em ko leh palat 1.6 Million ngut kiwa dang yoh thymme ha kini ki 7 sngi iwa da jan man chiteiñ na waroh kiwa dang yoh hapoh pyrthai deiwa em leh palat 16,100 ngut kiwa yap, iwa ku da 44% hawa nujor waka tayaw wa da dep.
Ha man ki 10,000 ngut ha Europe, da em 127 ngut kiwa yoh wa 4 ngut kiwa yap.
Ha United States da em 278 ngut kiwa yoh wa 7 ngut kiwa yap ha man ki 10,000 ngut kiwa chong chnong.
Neiliang u President ka USA u Donald Trump da beiñ u ya kini ki Lockdown wa thymme wa pynkrehkaam ha Europe.
