Khliehriat: Ka East Jaiñtia national council (EJNC) hei yahkhmat yong u Sambormi Lyngdoh uwa man kam u President yong ka EJNC hei ya emlang u General Secretary u Nangjan Dkhar, Vice President u Allmiki Ryngkhlem wa ki dkhot ka yong ka, ynne ka sngi da lai yachem ki ya u DC ka East Jaiñtia Hills District u E. Kharmalki kam chibynta wow paan pynche wa ha kawon ka yurim wa daw pynman ki yaka Public Hearing ka Star Cement ha yung krehkaam u DC, deiwa pynkynmoo leh ya iwa da thoh cha oo ha ka 20 tarik u bnai wa dadep kawa da pynsñiaw ki yei pyrchah wow pynman yaka Public Hearing yong ka Star Cement ha pchem yong ka yung krehkaam u DC.
Hadien i yachem yong ki wa u DC, u DC da khana che u wa ym toh i bor samen yong oo wa pynman ya kani ka Public Hearing kamwa da booh i thaw, wei ini toh i phah yong ka sorkar bei na ka chnat yong ka Ministry of Environment Forest and Climate Change hadien wa da duna i ku kiwa yoh ya u COVID-19.
Hajrong ini, u DC da e u i kular hakhmat yong ka seiñ wow pyrchang u wow phah da i thoh cha ka sorkar jylla wa chadooh ka chnat yong ka Ministry Environment of Forest and Climate Change wow phah kyrriah noh ya kani ka thaw pynman Public Hearing cha kawi tawan ka thaw neidaw i pyrchah yong ka seiñ wa kiwa chong chnong.
U President ka EJNC u Sambormi Lyngdoh hawa klam wa kiwa thoh khubor da ong u hachwa wow lai yachem ki wa u DC, da pynman ki yaka yachem lang ka Executive Committee yong ka seiñ wei da rai ko leh lada ka yung krehkaam yong u DC ym kyrriah ko ya kani ka thaw pynman Public Hearing ha kini ki kajiak sngi wow wan, ka seiñ u rah lama yong noh ko haka 11 tarik uni u bnai kam i dak wow pynyoo yei pyrchah wow pynman ya katai ka Public Hearing ha pchem ka yung krehkaam u DC kam wow pynsñiaw leh cha ka sorkar jylla wa cha ka sorkar bei ya ini.
Da khut da wer u leh ya kiwa chong chnong wa sñiawkhia ya kani kaam wa yaki para seiñbhalang cha katai ka sngi.
Da ong u leh katkam ka aiñ yong ka Environmental Impact Assessment, 2016 wym ye ki wow pynman yaka Public Hearing cha jngai na i thaw wa mut u tih (Mining Project), da ong u leh wa ini i thmu yong ka sorkar jylla lane ka sorkar bei wow pynman ya kani ka Public Hearing ha pchem u DC da man ko pyrchah ya ka aiñ Environmental Impact Assessment neidaw wa da jngai palat na katai ka thaw tih.
Da booh u leh yei kyntu ya kiwa yahkhmat yong ka chnong Khliehriat East wa ka Khliehriat West wow pyrchah ki ya itai i thmu yong ka sorkar wow pynman ya katai ka Public Hearing ha ka District Headquarter neidaw wa kiwa yoh COVID-19 leh daw joor chooh chooh ki.
