Hadien wa da poi i chah khang u sarok NH-306 cha ka sngi wa 6 sngi hadooh wym yoh de u lai u wan ki truck kit mar na Assam cha Mizoram wa kiwa lai na Mizoram cha Assam, ynnin ka sngi won da em 8 tylli ki truck na Mizoram wa poi cha Imphal, Manipur yow lai kit phñiang, ki LPG wa kiwi ki mar wa emkaam.
Katkam wa pynbait ka sorkar Mizoram da em 15 tylli ki truck wow poi na Mizoram heiwa da poi 8 tylli chwa lyngba u National Highway-201B.
Ki 8 tylli ki Truck kiwa da poi toh kiwa em 3 tylli ki wow kit LPG wa 5 tylli ki wow kit phniang.
Hadien wa mih ka kajia pood hapyrdi ka Assam-Mizoram, da khang ya u sarok da ki bru ka Assam ya u sarok NH-306 ha i bynta ka Vairengte Sub Division kawa em hapoh ka Kolasib District ka Assam wei uni u sarok man u kam u thied snam ka jylla Mizoram.
Neiliang ka Mizoram da pynbaad ko wa ini i kynaad ha khappood da mih i neidaw wa em ki nong Bangladesh kiwa psiah pyrchah yaka aiñ chapoh ka ri kiwa da pyrchang wow kam yei thaw ka Mizoram heiwa da booh da ki pulit ha ini i thaw kiwa ym bien ka Mizoram wow kyrriah kat wym pu pynlait yei khang sarok.
