Jowai: Neidaw wa sih palat u sarok National Highway-6 na Jowai cha Ratacherra, uwa da dap katni sa du ki thlu kiwa da em tymbud uni u sarok kamwa 10-15 Km uwa pait daka National Highway Authority of India (NHAI) nadooh wa wai ya oo ha u snem 2018.
Kamtæ neiliang ka East Jaiñtia Hills Driver Association (EJHDA) Central Body lyngba u President u Lambor Dkhar wa u Secretary u Gerald Phawa, da phah syndon ki da i thoh cha u Chairman ka National Highway Authority of India, New Delhi, deiwa kyrpaad ya utai u Chairman wow sangeh noh yei chim poisa na ki ar tylli ki Toll Plaza kiwa em ha ki bynta u surok ha Pasyih, West Jaiñtia Hills wa ha Lumshnong, East Jaiñtia Hills District.
Ka seiñ da ong ko wa ini i chim poisa na kitai ki Toll Plazas ym yahap de wa i long i man yong u sarok, kawa da pynchitom hadooh kattæ kattæ ya ki kari wa lai na uni u surok NH-6.
Neibynta i chngaaiñ yong kiwa yah wa ki paidbah wa lai wa wan, ka seiñ da kyntu joor ko wow pynchna noh smat ya uni u sarok wei da kyntu kamjooh wow pynlait noh ya ka poisa (Fund) wow pynbha ya u sarok, khnang wow pynsuk ya i lai i wan wei ka seiñ da ong ko lada ym pu ye u pyndep ya i chna pynbha ya u sarok, kitai ki Toll Gate toh u sangeh chwa ya i lum piosa na ki kari.
