Ynne ka sngi hadien wa mih i pyrchah na u MDC ka Jowai Central, u Andrew Shullai heiyatoh wow kyrriah noh ya ka yung krehkaam ka PWD, North Jowai Division na Jowai cha Shangpung da mih won sa i pyrchah ya ini i rai ka sorkar sa na ka Dorbar Chnong Ladthadlaboh, Jowai.
Neiliang u Waheh Chnong ka Ladthadlaboh, u LD Lakiang da ong u wa da pyrchah ya ini i rai ka sorkar toh wa hadien wa ym em iwon iwon leh i thoh namo i pyntip na ka sorkar hajrong ini i thmu yong ka weiwa katkam wa man katni kani ka yung krehkaam em ko hapoh u pood u ang ka chnong Ladthadlaboh.
U Lakiang da pynksan u leh wa chwa wow kyrriah ya kani ka yung krehkaam da emkaam wow pynman ya i pynsñiaw paidbah tangwa yeini leh ym em u pynman.
Chooh chooh da ong u Lakiang wa emkaam wow pynman ya ka pynsñiaw paidbah namo ka Public Hearing khnang wow ye u pynlai bait ya ini i kaam.
Da pynrap u leh wa ya ki khlieh ki yung krehkaam yong ki chnat waphær waphær emkaam toh u neh ki ha ki Headquarter ki District neibynta i bha i miat ki paidbah.
