Jowai: Ka seiñ All Hynniewtrep People United Front (AHPUF) kawa yahkhmat da u President u J. Phawa wa u Chandame Sungoh, General Secretary da beiñ joor ki ya yaka yung krehkaam u District Transport Officer, West Jaiñtia Hills District, kamjooh leh yaka chnat Commissioner Transport of Meghalaya Shillong, hajrong i wym e jubab ki yaka RTI wa ka seiñ da paan ko nadooh ka 5 tarik u Naiynru 2020.
Neiliang kini kiwa yahkhmat khana ki wa nadooh katai ka tarik wa li paan RTI da yang ki hadooh kamwa chibnai wow yoh jubab tangwa ym em yoh jubab ki iyi iyi, kamtæ da lai mih ki cha ka yung krehkaam u DTO, West Jaiñtia yow paan jubab ki kawa da phah ki yaka Copy cha u Commissioner of Transport Meghalaya, Shillong neidaw wym ye ki wow e jubab yaka RTI wa paan ki.
Neitæ hadien wa da lai mih biang ki cha u DTO tangwa e won ki da ka Copy wa da phah ki cha u Commissioner Transport of Meghalaya Shillong, wei yeini leh da yang ki hadooh kamwa 2 bnai tam. Hadien i yachem yumut, da thoh noh ki cha u DTO daka First Appellate Authority Appeal haka 23 tarik u Naikhynde iwa da tam bnai kattu leh ym em yoh ki iwon iwon i jubab.
Ki phang wa ka seiñ AHPUF da pan yutip ko lyngba ka RTI toh hajrong ki aiñ ki kyndon yong ka sorkar jylla heiyatoh wa i booh yaki Weighbridge hapoh ka jylla, katwon tylli em ki hapoh ki ar District wa kynthup yaka West waka East Jaiñtia Hills wa ki thaw wa em ki, i pyrtuid ki bru wa pynlai yaki deilang ki kot ki sla wa yasoi waka sorkar, i dor wa ki Weighbridge su ki chaka sorkar, i dor bai thaw yaki kari wa i dor wa hap su kiwa kit palat pood, ki jait pynchitom wa ki Weighbridge ye ki u leh pyrchah ya kiwa kit tam.
Kamtæ hajrong i wym ye ka chnat krehkaam u e jubab, ka seiñ da pynsñiaw ko i lyngngoh neibhah khana ki wa da boonsien lai ki leh wym em yoh ki yei jubab.
U Chandame Sungoh da pynrap u leh deiwa ong, hei sakhiat hawa paan RTI toh wa kwah i u tip yei rukom krehkaam yong ka chnat sorkar, wei yaki bynta wym ye ki u e leh toh u kdaw ki katwa yeiwa ye won ki u e toh u e ki hapoh i por, wei sñiawthooh ki leh wa paan ki yeiwa ye hi ki u e.
Katwa kamtæ da beiñ joor ki ya ka yung krehkaam u District Transport Officer, West Jaiñtia Hills, kamjooh yaka yung krehkaam wa hakhlieh dooh ka Commissioner Transport of Meghalaya Shillong wym kheiñkor ki yei hok paan yutip lyngba ka RTI.
Neiliang ka seiñ ong ko wa ym chong klikti ko wei daw thooh chooh chooh ko ki laad ki luti yow lai chakhmat.
