Shillong: Ka Deputy Commissioner, East Khasi Hills District kawa man leh ka Chairman ka District Water & Sanitation Mission (DWSM) ynne da wai ko ya ka esikai wa chi sngi namo ka Training Cum Orientation Programme hajrong ka Jal Jeevan Mission for District Level Functionaries ka DWSM.
Ya kani ka esikai da pynman ha Conference Hall ka yung krehkaam u Chief Engineer, PHE, Shillong.
Ka Jal Jeevan Mission (JJM), toh ka thong ka sorkar pyrdi kawa thmu wow pynpoi umkor cha waroh ki manyung namo ka Functional Household Tap Connection (FHTC) cha waroh ki manyung ha ki thaw palatsor chwa u snem 2024 kawa da sdang da u montri rangbahdooh ka ri, u Narendra Modi ha ka 15 Naisaphra 2019.
Ha Meghalaya, da booh thong wow pyndep yei pynpoi umkor FHTC cha waroh ki manyung ha u snem 2023. Khnang wow jop ya ka thong yong ka JJM hapoh ka jylla wa kammon u pynkrehkaam ya ka Mission toh lyngba i kreh hapyrdi ki bor ka jylla, ki District wa ki chnong.
Ka I. Laloo, Deputy Commissioner East Khasi District, da ong ko wa du 18% donhi ki manyung ka ri kiwa da yoh FHTC wei hajrong ini ka thong yong ka Jal Jeevan Mission toh wow pynpoi umkor ha waroh ki manyung chwa u 2024 wei ka luti man ko kawa jngai neibhah wa emkaam wow pynpoi um cha waroh ki chnong iwa daw pynsuk ya ki kynthai wa ki khynnah wow lait ki u lai thooh um.
Da pyntip ko wa hadooh katni da em 40% wa da yoh myntoi na kani ka Mission hapoh ka jylla, ka Laloo da kyntu ko leh ya waroh ki chnat wow krehlang ki khnang wow poi heiwa da booh da thmu.
Ha kani ka sngi da emlang ki BDO wa SDO ka East Khasi Hills District, ki Executive Engineers, District Officer yong ki chnat waphær waphær wa ki dkhot ka DWSM.
