Ka Facebook ynnin ka sngi da kdaw ko ya iwi i Video wa booh da u montri ka Assam u Himanta Biswa Sarma kam ka khubor thok (False Information) iwa da booh u ha i step ka 6 tarik iwa pynyoo yei pdiang ki paidbah ya u MP ka All India United Democratic Front u Badruddin Ajmal ha Silchar Airport.
U Himanta ha ini i Facebook Post da ong u wa ki bru wa pyrchah ri da kbai ki da ki kyntien “PAKISTAN ZINDABAD” heipor wa pdiang ki ya u Ajmal deiwa pynbaad u leh deiwa ong wa ini pynyoo ko yaka Indian National Congress kawa pynchlur ya kini ki jaitbru deiwa yakrehlang waki wei daw yaleh pyrchah ya ini.
Ka Facebook da ong ko wa ya ini i Video da paitbniah da ki bru wa leh yaki kaam wow pynsakhiat yaki khubor namo ki “Fact-Checkers” kiwa laitlooid kiwa ym em yachah chilliang wei da chem wa iwa kam u Himanta ymtoh iwa sakhiat.
Neiliang ka All India United Democratic Front da pynche ko wa kiwa kyrchaan ya u MP da ong ki “Aziz Khan Zindabad” u MLA ka Party na South Karimganj Constituency. Heiwa ya ini i jooh leh da pynsakhiat da ki Fact-Checking Website kam ka AltNews waka BoomLive kiwa da kyrchaan leh ya ini wa ong ka Party.
Hajrong ini, u Himanta won da ong u wa ka Facebook ym jooh em kdaw ko kamni ya ki khubor thok kiwa pynmih pyrchah yaka BJP. Da ong u leh wa ya ini i Video da dep wow ujor cha ki pulit wei daw phah yaki bru wa chemphang wow paitbniah wow puræ bniah ya ini i Video. Deiwa pynrap wa ka Facebook da e ko yaka rai iwa pynyoo wa man ko kawa bniah bha tangwa ki khubor thok wa mih pyrchah ya i ka Facebook ym jooh em pyndam ko ki.
