U MLA ka Jowai, u Wailadmiki Shylla da ong u wa ha ini i por wa dadep neiliang yong oo da pyrchah u yei thmu wow kyrriah ya ka yung krehkaam ka PWD Jowai North Division na Jowai cha Shangpung wei hajrong ini da pynman ya ki yalang neibhah ym kwah u wow rah ya ka khlem em iwon iwon iwa mih salan ha i thaw wow em kani ka yung krehkaam.
Da pynkynmoo u wa ha ini wa dep ha Assembly da klam u hajrong i chah iehbeiñ ka Ri-loom Jaiñtia ha kiwa boon ki liang deiwa kyntu wow wanrah ya ki kaam pynroi ha kani ka kynti, kamtæ deiwa bichaar bniah yeini i kyrriah ya kani ka yung krehkaam ka PWD ym em i doohnong ka Jowai wei ymye u len yei emyatoh wa i sñiaw yajan ya ki bru wa kani ka yung krehkaam khamtam ki wakreh ha kani ka thaw kiwa na Jowai wei kiwa kreh ymtoh u dooh mynsien ki deiwa leh yeini.
Hadien wa da chong pyrkhat yeini wa u montri rangbah ka jylla, u Conrad Sangma da rai noh wow wanrah da ka Mini Secretariat næ ka District Secretariat ha kani ka thaw wei yeini da pynskem ynnin hadien wa wan pait u Conrad ya kani ka thaw wow chna ya ka Secretariat ha Jowai.
Chooh chooh da ong u wa deiwa wanrah ya ka Mini Secretariat daw myntoi ka Ri-loom Jaiñtia waroh na ka neibhah ym emkaam de wow lai ki neiwi i thaw cheiwi tawon neibhah waroh iwa emkaam ki daw ye u pyndep ha kawi donhi ka yung namo ka thaw wei neini daw ye u pynduna yei lut sepai i por wa ka poisa ki bru.
U Wailadmiki da ong u wa ki paidbah ka Jowai ymtoh u sñiawthooh bakla ki deiwa pynkynmoo ya u snem 2015 heiwa da rah ya ka yung krehkaam ka PWD-NEC da rah ya ka cha Khliehriat neibhah wa ym em de ki sarok wa em hapoh ka Jowai wei hajrong i jooh wot ya ka PWD-Jowai North leh ye u rah neini neibhah wa ym em de ki sarok hapoh kani ka Division wa em ha Jowai.
Heijooh i por da kdaw u ya ka Civil Hospital heipor wa rah ya ka cha Ialong da em i chrai na ki bru tangwa ym em wow poi pyrkhat wa daw wanrah ya ka Maternity & Children Hospital ha Jowai ha i thaw wa jooh em ka Civil Hospital.
Da kyrmen u leh wa ki bru na Jowai daw yoo ki ya ki kaam kiwa daw leh u kam u khynroo neibhah ha kini ki por wa dadep da beh da kdong u ya ki kaam (Project) kiwa rim kiwa da ieh khlem pyndep da kiwa mihkhmat warim deiwa kyntu ya ki paidbah ka Jowai Constituency wow yaichah ki neibhah ha ki bnai wow wan daw yoo ki ya ki kaam yong oo.
Chooh chooh da kdaw u leh ya i pynku kyrdan ya ka Jowai kam ka Smart Town heiwa ynnin da wan sorjamin (Survey) ki bru chemphang heiwa daw chna ya ki sarok, ki luti lai-kjat, ki Streetlight, ki CCTV Camera, ki Open Air Gym wa kiwi kiwi.
