Hadien wa e u Montri Rangbah ka jylla u Conrad K Sangma yei jubab hapoh ka dorbar heiyatoh wa pynman yaka ‘Cabinet on the move’ heiwa da pyman yaka yalang ki montri sorkar namo ka Cabiment Meeting cha baar ka Shillong na iwa jooh kawa da poi i lut hadooh T. 19,18,221 kawa da dep wow pynman ha Tura wa ha Jowai tangwa da pyndam chwa wow pteiñ ya ini neidaw ka khlam COVID-19.
Neiliang u MLA ka Congress na Rangsakona Constituency u Zenith Sangma da ong u wa ini toh iwa pynlutphut hi-eh yaka poisa paidbah.
Heiwa u Conrad da ong u wa i thmu wa leh ya ini i pynman yaka Cabinet cha kiwi ki thaw toh yow pynyajan yaki paidbah waka sorkar.
Neiliang u Zenith da kylli u wa heiwon i rukom wa ki paidbah u sñiaw yajan ki lane u yei u yajan waki paidbah deiwa leh ya ini?
U Conrad da jubab u wa ini daw yarap ko yaka Cabinet wow yachem wei wow tip ya iyi wa maad ki bru ha kiwa boon ki chnong ki thaw.
“Ym toh wa pynwit pynthut i yei krehkaam ki sahep sorkar. Deiwa yoh ki Montri sorkar wow yachong lang wa ki sahep kam ha Tura wa Jowai, e ko yei sñiaw wa ki leh toh ym em chah ieh mylliñ ki wei yoh mynsien ki na ini wei ym ye wow chim ya waroh i rai deiwa chong bait ha Shillong wei da leh ya ini deiwa pykrhat yei myntoilang yong ki waroh wei yow e yaka chakri paidbah kawa biang.
U Zenith da jubab u deiwa ong wa lada kwah ka sorkar wow yajan waki paidbah, toh u chna ko yaki Block wa thymme, ki District wa thymme waki Civil Sub-division wa thymme.
