U Montri Rangbah ka jylla u Conrad K Sangma uwa pait leh yaka chnat Mining hawa e yei jubab ynne ka sngi hapoh ka dorbar heiyatoh waka District Mineral Foundation Fund ka poisa kawa da pyllang na ki marpohkhyndaw wa katwon naka da dep wow pynlait, da khana u:
Ha East Khasi Hills District neibynta u 2019-20 da pynlait T. 12,64,78,168 ha u 2020-21 T. 1,24,77,646.
Ha South West Khasi Hills neibynta u 2019-20 NIL, 2020-21 T. 94,48,470.
Ha Ri Bhoi neibynta u 2019-20 NIL, ha u 2020-21 T. 47,91,937.
Ha East Jaiñtia Hills 2019-20 NIL, ha u 2020-21 T. 7,63,71,646.
Ha West Jaiñtia Hills 2019-20 T. 1,50,00,000, ha u 2020-21 T. 19,25,118.
Ha East Garo Hills 2019-20 T. 2,67,120, ha u 2020-21 T. 3,05,280.
Waroh ha u 2019-20 da pynlait T. 14,17,45,288 katwa ha u 2020-21 da pynlait T. 10,53,20,097 deilang da poi T. 24,70,65,385.
Da pyntip u leh wa i pynemkaam yaka DMF Fund toh katkam ki kyndon wa da booh ka sorkar pyrdi hapoh ka PMKKKY.
Ki kaam wa da pynemkaam ya kani ka poisa toh wow pynchna yaki yung skur, ki Angandwadi Centre, ki kaam sumaar sukhær, i pynchna sarok, i wanrah yaka um kor, u pynim biang yaki um ki wah hadooh wow yada yaka khlam COVID-19.
U MLA ka Mawsynram u HM Shangpliang hawa booddien yeiwa jubab u Montri Rangbah da kylli u kiyi kiwa da pynkupbor wow pynemkaam ya kani ka poisa.
Neiliang u Conrad da jubab u deiwa ong wa kiwa ye u pynemkaam ya kani ka poisa toh da ka Committee ka District Mineral Foundation Fund heiwa u Chairman yong ka toh u DC ka District.
U Shangpliang da ong u wa ka PMKKY ym em ong che ko kiyi wow ye u pynkrehkaam ya kani ka poisa wei hei chem yong oo toh ki BDO wa pynkrehkaam ya kani ka poisa khlem em kitæ ki Committee.
U Conrad da pynche u leh wa ki BDO ye ki wow pynkrehkaam ya kani ka poisa kamjooh kiwi ki chnat sorkar (Line Department) iwa chong heiwa emkaam wei da pait ya ini waroh da ka DMF.
U Shangpliang da jubab u deiwa ong u wa hapoh Mawsynram, u BDO wa jied u ya kiwon ki jait kaam wow kreh wei da pynkreh leh da oo hi, kamtæ ka sorkar toh u pynmih hukum ko kawa klam che kiyi wa ye wow pynkreh ya kani ka poisa, deiwa kylli leh iyi i daw wym pynman yaki MLA kam chibynta ka Governing Council ha ki jar jiar ki District heiwa u Conrad da ong u wa da dep phah ya waroh ki DC wow thung yaki MLA wa ki MP kam ki dkhot.
Heiyatoh won wa kammon da yabhah ya kani ka poisa, u Conrad da pynche u wa kani ka District Mineral Foundation Fund toh kawa da pyllang naka poisa wa mih naka bai Royalty kawa hap su kam chibynta wow chalan ya u marpohkhyndaw na kiwa da yoh ya ki Mining Lease heiwa 10% hadooh 30% iwa chong ha u marpohkhyndaw da lai ko cha ka DMF, wei ya kani ka poisa toh u pynlut ha ki thaw wa chah ktah nei tih ya u marpohkhyndaw tangwaiwa khaddooh i rai chong ko ha u DC.
