Jowai: Ka Online Registration neibynta ki Cyber Cafe da sdang yaka hapoh ka West Jaiñtia Hill da u Deputy Commissioner ka District u Garod LSN Dykes ynne ka sngi ha Conference Room ka yung krehkaam yong oo.
Hawa e yei klam haka yalang wa tbian, u Deputy Commissioner u Garod LSN Dkyes da ong u wa ya kani ka Cyber Café Online Registration toh kawa da sdang yow booh yaki kyndon krehkaam ki Cyber Café kamjooh yow yaleh pyrchah yaka Cyber Crime hapoh ka District. Da kyntu u ya waroh ki Cyber Café wow wan ki yow leh Registration chwa ka 31-12-20 deiwa bood yaka Meghalaya Cyber Café Rules 2012. Da pyntip u leh wa yaki Certificate uwa embor wow e ha West Jaiñtia Hills District toh u Deputy Commissioner, Jowai.
Ka Ida Rymbai, District Informatics Officer heiwa e yei klam da ong ko wa ka West Jaiñtia Hills toh ka District wa nyngkong wa da sdang ya ini wei daw yarap i leh hei wow pait yei krehkaam yong waroh ki Cyber Café ka District.
Ya ki ktien pdiang sñiawbha da yoh naka Priyanka Zolleen Mawlong, R- District Manager, Information Technology & Communication Department, Jowai katwa yaki ktien e khublei da e da u Mark A. Challam, Extra Assistant Commissioner.
Neiliang u Deputy Commissioner da pynmih hukum u leh ynne ka sngi yow phah ya waroh ki tre ki Cyber Café kiwa em hapoh ka District wow Register ki hapoh ka Rule 3 ka Meghalaya Cyber Café Rules 2012 ka aiñ IT Act 2000 waka IT (Amendment) Act 2008 deiwa lai ha kini ki link ha wah https://www.meghalaya.gov.in/megportal/edistrict lane https://www.megedistrict.gov.in.
Ki Cyber Café ki wym leh ya ini daw ye ki wow chah pynchitom hapoh ka Section 43, 43A,44 &45 ka IT Act 2002 waka IT (Amendment ) Act 2008 nadooh ka 01-01-21.
