Ha i yoh kem drug wa heh bha ha Manipur, ki chipai ka Assam Rifles waka Manipur Police da yoh ki wow kem 72 Kg i Brown Sugar wa chongdor T. 287 klur haka 11 tarik uni u bnai na Kamu, Thoubal.
Hadien wa yoh yutip wa tikna heiyatoh wa em ki drugs wa da murieh kiwa da yang wow dai cha kylleiñ ka ri, da thooh da ka Assam Rifles waki pulit ka Manipur ha i miet ka 10 tarik hadooh ka sngi wa bood ka 11 tarik ha ki thaw wa em cha khloo heiwa da chem hei step ka 11 tarik ya le tylli ki yusong wa em Brown Sugar.
Ki bor ka aiñ da ong ki wa u pteiñ ki wow yaleh pyrchah ya i drugs haka thaaiñ North East deiwa thooh yaki thaw chna ya ki drugs wa kamjooh i rukom pynlai yaw yaki.
Ha iwi tawon iwa jia, ka Assam Rifles da pyntip ko wa haka 11 tarik hi, da yoh kem ki ya kiwa boon tylli ki kari kiwa kit yaki that wa wanrah na baar ri kamjooh kiwi ki mar kiwa chongdor T. 75 lak najan i chnong Moreh, Manipur.
Hawa khynra ya ki 15 tylli ki kari, da chem yaki that wa chna ha China, ki Jeans, ki riam kynthai, ki Blankets, ki juti khlem da biang ki kot ki sla.
Ka Assam Rifles da ong ko wa kini ki mar toh kiwa da khayi tooh na Myanmar khlem da su yaka bai Custom iwa da pyndooh nong yaka sorkar.
Da pyntip leh wa heiyatoh wa ini, da kem ya 26 ngut ki bru kiwa kit ya kini ki mar heiwa yaki mar waki kari wa kem da ekti cha ki pulit ka Moreh Police Station yow leh ki yeiwa emkaam.
