U Union Health Minister u Harsh Vardhan da ong u yaki 4 tylli ki jylla ka Northeast kitæ ka Tripura, Manipur, Meghalaya wa Mizoram wow pynjoor ki yei Test ya kitu kiwa em hei maa (High Risk Groups) yow lait neipoor ka khlam COVID-19, iwa da ong u ynnin ka sngi.
Haka yalang wa lyngba ka Video Conference wa ki 7 tylli ki jylla wa kynthup yaki 4 tylli ki jylla na Northeast, da ong u wa kiwa dang chah ktah ha uni u khñiang da ku ki ha Manipur wei i boon kiwa yoh pynyoo ko wa em i poor iwa ym em wa yoo.
“Deiwa em 70% kiwa yoh ha nongbah ka Mizoram ka Aizawl, ka jylla da yoo ko yei ku kiwa dang em ya uni u khñiang. Ka Tripura waka Meghalaya leh da ku kiwa yap da 37% wei kiwa dang em ya uni u khñiang toh kiwa em ha i rta wa 45-60 snem, kiwa toh u ye u yada,” da ong u Health Minister.
U Harsh Vardhan da e buit u wow pynjoor yei leh Test ha ki District wa boon kiwa yoh, deiwa ong wa ymtoh u dam u leh yaka Rapid Antigen Test ya kitu kiwa man Negative tangwa kiwa em yaki dak ki chin wa chitom, wow paitbniah leh ya kitu kiwa ye u yoh yaka SARI (Severe Acute Respiratory Illness) wa ILI (Influenza-Like Illness), u pynkhlaan yei booddien ya kitu kiwa yachem wa kiwa yoh ya uni u khñiang kamjooh kitu kiwa leh yei chonkset ha yung.
Da ong u leh wa toh wow booh yaka thong wa kiwa yap toh u em ki duna yaka 1%.
Deiwa em 356 ngut kiwa yap, ka Tripura toh kawa boon dooh kiwa yap na ki jylla ka Northeast deiwa em 1.12%. Ka jylla da em ko 31,706 kiwa da dep yoh COVID-19 katwa kiwa chait da em ki 30,185 ngut iwa mut wa kiwa chait da em ki 95.27%.
Ka Mizoram da yoh ko ya wa yap nyngkong na u COVID-19 haka 28 tarik u Naichiphaw, da em ko 3,242 ngut kiwa da dep yoh ya uni u khñiang heiwa kiwa chait da em ki 2,688 ngut katwa kiwa dang em ya uni u khñiang da em ki 552 ngut. Na waroh da em 830 ngut ki kynthai heiwa 2,290 ngut toh kiwa du na Aizawl District.
Ha Meghalaya da em 10,581 ngut kiwa da dep yoh katwa kiwa yap da em 98 ngut, katwa ha Manipur da em 20,950 ngut kiwa yoh katwa kiwa yap da em ki 202 ngut.
U Chief Minister ka Manipur u N. Biren Singh da pyntip u haka yalang wa hawa sdang ka jylla da ye bha ko wow yada tangwa hadien wa liwan kiwa chong chnong ka jylla da ki hajar ngut kamtæ da ku noh kiwa yoh ya uni u khñiang.
Neiliang u Health and Family Welfare Minister ka Mizoram u R. Lalthangliana da kyntu u ya u Health Minister wow pynku yaka yarap poisa wa e cha ka jylla yow yaleh pyrchah yaka khlam.
