Ka Balang Katholik Jowai da yoh ko wow pyndep yaka All Souls’ Day ha uni u snem ynne ka sngi heithaw ka 2 tarik uni u bnai kamwa jooh leh man-u-snem neidaw wa da pynbna yaka Moosalyngkat kawa em u loom tlep-bru kam ka Containment Area yow yada naka khlam COVID-19.
Kamtæ ynne ka sngi da pyndep ya kani ka sngi wa kyrpang kiwa da khlaad deiwa chah kajiak ngut ki bru kiwa da yabhah wei da booh por yaki wow wan ki da jar jiar ki CMC.
Yaka Iawmusiang-Khimusniang CMC da booh por nadooh 7 waje i step hadooh 8 waje i step, yaka Newhill-Caroline-Ladthadlaboh CMC da booh por nadooh 8:30 i step hadooh 9:30 i step, yaka Tpeppale-Chilliangraij CMC nadooh 10 waje i step hadooh 11 waje i step, yaka Mookyrdup-Tyndowapung CMC nadooh 11:30 i step hadooh 12:30 pyrdi sngi katwa yaka Moosalyngkat-Dongmihsngi nadooh 1 waje i sngi hadooh 2 waje i sngi.
Yaka lehniam Mass wakhooid ha loom tlep-bru da pynman heipor 2:30 i sngi deiwa chah du 5 ngut na kawi ka CMC kiwa da jied chwa da ki CMC.
Katkam i ngait ki khon ka Balang Katholic, i mynsien kiwa khlaad lai ki cha le tylli ki thaw. Kiwa yap khlem em i leh pap wei im katkam wa da booh u Blai lai ki cha bnieñ. Kiwa da joor i pap kiwa ym em pynkylla yei rukom im bakla yong ki lai ki cha dujok. Kiwa em ha pyrdi won poi ki cha ka Diñ Pynkhooid (Purgatory) heiwa da ngait wa boon ki wa khlaad neh ki ha ini i thaw.
Kamtæ ka All Souls Day da pynman leh yow yasaaid neibynta kiwa da khlaad yow poi ki cha bneiñ.
