Ynne man ko ka sngi wa kyrpang ya ki khynnah namo kawa tip leh kam ka Children’s Day wei kam chibynta wow wanrah yei kmen wa i ka’it mynsien ya ki kattu katni ngut, ka yung krehkaam u Superintendent of Police ka West Jaiñtia Hills da lai lehkmen ko ya kani ka sngi wa ki khynnah wa em ha ka North East India Mission Association (NEIMA), Sahsniang.
Ha kani ka sngi da wan chimbynta da ki heh pulit ka District nadooh u Superintendent of Police u Bikram D. Marak, u Deputy Superintendent of Police (HQ) u M.J Marngar, ka Deputy Superintendent of Police (Crime) ka C.W. Lyngdoh, MPS wa u K. Suchiang Sub Inspector In-charge, Tihwieh Bn. Camp.
Kani ka lehkmen da sdang ko da ka yalang wa tbian heiwa da yoh ya ki kyntien piang burom na u Rev. B.D Shangdiar uwa pait ya kani ka thaw ri khynnah. Katkam wa man katni hapoh kani ka thaw em ki khynnah khonswet hadooh 22 ngut kiwa kynthup ya 12 ngut ki kynthai wa 10 ngut ki chynrang.
Ha kani ka sngi da yoh yei klam na u M.J. Marngar, ka C.W. Lyngdoh, kiwa da kyntu ya ki khynnah wow man ki kiwa emsalon wa kiwa minot.
Neiliang u SP ka District, u Bikram Marak da ong u wa katkam wa man katni da yaleh wow wanrah yei yajan hapyrdi ki bru wa ki pulit wei toh leh i kaamram yong ki wow pynkhor ya kiwa tyngkheiñ ya ki aiñ.
Ha kani ka jooh ka sngi ka yung krehkaam u Superintendent of Police ka District da lai pait ko leh sa ya kawi ka thaw ri khynnah, ka Sacred Heart SD Convent kawa em hapoh kani hi ka chnong.
