Ka chnong Shymplong toh kawi na ki chnong kawa da pawnaam bha nadooh ki por nachwa neidaw wa em chiboon ki dakha ha ka Wah Lukha kawa kai lyngba kani ka chnong tangwa kat dang mih ki snem ki dakha da sdang duna bha ki ha ka na ki daw wa boonjait.
Katwa kamtæ kam chibynta wow pynneh yei naam ka chnong wa ki dakha wa em ha ka Wah Lukha dei mynsien wa sñiawkhia ka Dorbar Chnong Shymplong daw pynman ko ya ka yakhih rah lama yong namo ka Black Flag Protest wow pyrchah ya ka pynsñiaw paidbah namo ka Public Hearing ka Star Cement wow tih moochuni na Brichyrnot neibhah i tih moochuni na kani ka thaw daw ktah i nyngkong ya ka Wah Lukha.
Ya kani ka yakhih daw pynman ha ka 17 tarik uni u bnai nadooh 11 waje i sngi ha Wah Lukha. Ka chnong Shymplong waroh kawi yoh myntoi ko chiboon na ki dakha wa em ha Wah Lukha neibhah man ko leh ka laad im ja yaki bru kiwa dooh wa duk neiwa khwe dakha.
Ki daw wa ka Dorbar Chnong da pynyieñ ko wow pyrchah ya ini i thmu toh wa kiwa boon ki tre chnong imja ki nei khwe dakha na kani ka wah, daw ktah ko ya ka um kawa pynemkaam ki bru wow baam u dih, u sait u sum wei katkam wa man katni kani ka um ymhoi de u pynemkaam ya ka heijooh i por da pyrchah joor leh wa ka karkhana ym em u pynkrehkaam ko yei kular wow thung kreh hadooh 60% da ki tre chnong tre thaw.
Heijooh io por ka Dorbar Chnong Shymplong da khut ko ya waroh ki bru kiwa ka’it wow wan khwe sñiawbha ha kani ka wah wow emlang ki ha kani ka sngi yakhih khnang wa i pyrchah u man i iwa jop.
