I metyap yong u Haradhan Chandra Roy u chipai ka Indian Army uwa na Assam da poi i ha Guwahati ynne i janmiet wei na Airport da kit yei metyap cha 151 Army Base Hospital ha Basistha Guwahati.
Ya i metyap da wan wow booh syntu leh da u Montri Rangbah ka Assam u Sarbananda Sonowal deilang ki heh ki chipai, wa ki sahep ki pulit ka Assam.
U Roy toh uwa na Phutukibari-Medhipara kawa em hapoh ka Sapatgram PS ha Dhubri District uwa man leh uwi naki 4 ngut ki chipai wa yap hei siat ka Pakistan cha chilliang pood u LOC haka sngi thohdieñ.
Ha i sait kylla ka India, da ong wa kamwa 6-7 ngut ki chipai ka Pakistan da khlaad ki wa kynthup ya arngut ki SSG Commando wei da mynsoo kamwa 10-12 ngut.
U Sonowal da pyntip u leh waka sorkar Assam daw yarap poisa ko T. 20 lak cha kiwa ha yung uni u chipai uwa da e yei mynsien neibynta ka ri.
Yaka niam ka rukom u Roy u pyndep mynstep ka sngi ha chnong u iwa em ha Dhubri deiwa leh burom da ki chipai.
