Ynne ka sngi kawa man ka sngi wa khut yakhih ka Synjuk Ki Waheh Chnong (SWC) – Jowai ya kawa da tip kam ka Stay At Home Protest wow pyrchah yei kyrriah ya ka yung krehkaam ka PWD Jowai North Division na Jowai cha Shangpung da man ko kawa lai bait khlem em iwon iwon i jia wa awri.
Da sakhi leh yei pynjoor ki bor pulit wow sonteri ha kylleiñ ka Jowai wow pyntikna wa ym em iwon iwon i awri awra.
Ki dukan dukdoh waroh ha Jowai da man ki kiwa khang heiwa wot ki yung krehkaam ki chnat sorkar, ki Bank wa kiwi kiwi da man ki kiwa khang.
Da em leh ki kattu katni ki yung krehkaam kam ka yung krehkaam u DC ka West Jaiñtia Hills da man ko kawa wai katwa ka yung krehkaam ka JHADC leh da man ko kawa khang.
Ki thaw pynyieñ kari leh da man ki kiwa thylli lait du ki kattu katni donhi ki kari wa lai luti.
