U Alan Niangti, uwa man kam u President ka Synjuk ki Waheh Chnong ka Jowai hadien wa ka yakhih phah chong yung yong ki ha Jowai man ko kawa jop ynne ka sngi, da e khublei u yei ya krehlang ki paidbah kiwa chong chnong ka Jowai, nadooh kiwa khih mylla, kiwa kamai kari, kiwa chong dukan wa kiwi kiwi.
Kamtæ da ong u wa ka yakhih yong ki u lai ko chakhmat wei haki sngi wow wan daw chong yalang biang ki yow chim yaka rai wow lai luti heiyatoh wa rah yaka yung krehkaam sorkar cha Shangpung, kamjooh kiwi ki kaam wa dang sah kam ka saam umkor na wah Umngot, i chna yaka Iawmusiang, i chna yaki luti syngkieñ wa kiwi, wei da yoo leh yei kyrchaan yong ki paidbah yaki yumut wa bha yong ka synjuk. Deiwa pyntip wa ki yakhih wa daw chim ym ktah ki yaki paidbah.
Heiyatoh wa i ong uwi na ki MLA wa ka synjuk da leh Politics ki, u Niangti da ong u wa ya ki Waheh Chnong da jied daki paidbah wei ym em iwon iwon i leh Politics wei kam ki Waheh Chnong da lai ki chirup waki paidbah.
Chooh chooh da ong u wa ka Shangpung hap kmen hi ko wei wow pynemburom hi ya u MLA yong ki uwa da ye u wow rah ya iwa da mut ki wei neiliang ka Synjuk ym em ko iyi iyi wow pyrchah ya kiwon kiwon ki kaam pynroi ha kiwon kiwon ki chnong ki thaw ha Ri Jaiñtia, wei kam ka Synjuk ka yieñ hi ko haka yurim wa ya kiwa rim wow pynneh wei sñiawkmen ko lada ka sorkar ye kow wow wanrah chiboon ki roi ki paar cha ki chnong ki thaw ka Ri Jaiñtia.
Da pynkut deiwa ong wa i sur paidbah toh iwa khlan neibhah kamwa yoo ynne ka sngi ki paidbah emlang ki chirup wa ka Synjuk wei chaniah ki leh yaka Synjuk kamtæ da lai katkam ki sur paidbah.
