Shillong: Ki 7 tylli ki seiñbhalang kiwa kynthup ya ka KSU, FKJGP, HNYF, RBYF, GSU, AYWO wa ka ADE da sdang ki ya i yakhih ynne ka sngi ha kylleiñ ki District ka jylla, wei ha nongbah Shillong ya ka yakhih da pynman ha Madan Malki heiwa ki dkhot yong kitai ki seiñbhalang da mih ki deilang wa ki Placard wa da thoh ya ki kyntien wa dawa wow pynkrehkaam noh ya ki aiñ wow yada ya ka jylla na i chah tyllep ha ki bru kiwa na baar.
U Lambokstarwell Marngar uwa man u President ka KSU, da ong u wa i pynman yaka yakhih hapyrdi yong ka khlam toh neidaw wa i chong u suki hi-eh ym man de neibhah kattu da jan em chi snem wa ka jylla da mynjur ko ya ka ILP ha ka yung dorbar, wei i wym pu em ye wow pynkrehkaam pynyoo wa ka sorkar India ym ym kheiñ ko yei angnood ki paidbah ka jylla.
Da ong u wa i pynkrehkaam ya ka MRSSA man ko kawa suki palat, wei da pynyoo wa i pynslem wow chna yaki khyrdop (Entry/Exit) toh neidaw wa ka sorkar jylla leh ym chimkhia ko ya kani ka kaam. Da ong u lada ya ka jylla Manipur da e ya ka ILP, iyi i eh ya ka sorkar India wow e ya ka Meghalaya.
Hajrong i wym ye ka sorkar jylla wow pynkohngooh ya ka sorkar pyrdi, wot hadien wa da dep wow mynjur ya ka rai (Resolution) nadooh u Kmaichonglad (Dec) u snem wa dep, u Marngar da ong u wa neidaw wym em i chimkhia, wei ye u man wa ha kitu ki por wa joor i pyrchah haka jylla wow pyrchah ya ka CAA wei dawa ILP, kamtæ i mynjur ya ka Resolution ye u man du wow pynbiej paidbah donhi.
U General Secretary ka HYNF, u Sadon Blah da ong u wa ka Resolution wa da mynjur da ka sorkar jylla hap ko wow lai lyngba u Lat ka jylla, u wow pyntip cha ka sorkar pyrdi, tangwa hadooh katni ki seniñbhalang ym tip ki ya ka Resolution wa da mynjur wa da lai ko næ ym em lyngba u Lat cha Delhi, deiwa ong leh wa ya ini i bynta kopsar ka sorkar jylla da mylliñ khnang ko yei thmu deiwa pynslem ya kani ka kaam.
Da ong u leh wa i tkoh yong ka sorkar India toh wym em ko i mon wow ap u sñiaw ya kiwon kiwon ki dawa yong ka jylla wow pynsangeh ya i wan psiah ki bru wa na baar cha kani ka jylla, deiwa pynrap leh wa ka sorkar pyrdi toh u burom ko yaka Resolution yong ka sorkar jylla neibhah wa katni ym toh de du i dawa yong ki seiñbhalang.
Neiliang u President ka FKJGP, u Wellbirth Rani da ong wa i sdang biang toh yow yoh ya ki aiñ wow yada ya ka jylla na ki bru wa na baar, khamtam hadien wa da pynkrehkaam ya ka Citizenship Amendment Act (CAA), deiwa ong u wa i wym chimkhia yong ka sorkar ya ki aiñ wow yada, pynyoo ko wa lehke hi-eh yei sñiaw ki paidbah.
Hawa yatoh wa ka ILP, da ong u wa waroh kyrchaan ki yaka sorkar neibhah wa da mynjur wow phah pynkrehkaam ya ka ILP ha ka jylla, wei lada ka sorkar India ym burom ko ya i sur ki paidbah ki seiñbhalang ym banse ki wow chim da ki luti wa rap eh, wei lada mih biang ka yakhih kawa rap heh, waroh ar tylli ki sorkar toh u chim ki yei kitkhlieh.
