Ka Joint Action Committee (JAC) wa kynthup ya ka Jaiñtia Hills Truck Owner Association, ka Jaiñtia Hills Clinkers and Transporter Association wa ka Meghalaya Truck Union ynne ka sngi da rai ko wow sangeh noh yei yakhih yong ka ya kawa da sdang nadooh ka 7 tarik uni u bnai.
Neiliang u Nehemayah Tyngkan uwa man kam u Chairman ka JAC, da ong u wa ya kani ka rai wow sangeh yakhih da chim hadien ka yalang ka Committee kawa da man ynne ka sngi ha Takhniang, Tuber Kmaichnong wei da wan ko hadien wa da kular u DC ka East Jaiñtia wow chimkhia yeini deiwa ong wa lada ki karkhana ymbien ki wow pynkrehkaam ya ini i dor thymme daw pynchitom ya ki (Karkhana).
Da ong u leh wa ha ka 17 tarik uni u bnai da em ka yalang hapyrdi ki arliang wa u DC ka District heiwa da rai wa ki Godown hapoh ka jylla heiwa ki mar wa em (Qquantity) toh u neh i kamjooh kam nachwa weiwa i dor bai kit mar na Loomchnong cha Assam ymye i wow krehkaam neibhah wa tyngkhooh i wa ka aiñ (iwa mut i dor u krehkaam i du hawa kit mar hapoh jylla donhi).
U President ka Jaiñtia Hills Truck Owners Association (JHTOA) u Nidamon Shullet da ong u wa i daw wa sangeh ya i yakhih toh hadien wa da pdiang ki karkhana u su da i dor wa da booh ka sorkar wei da rai wa ka sorkar u pyntikna ko wow pynneh pynsah ki (karkhana) ya ki Godown wa da em chwa nadooh kiwa em ha Byrnihat, 9mer, Jorobat wa kamtæ ter ter, wei da yaklam wa ki Godown wa em ha liang ka Assam toh u neh ki kamjooh wei wow su i dor ka sorkar jylla neibhah wa hanlada em ki ha Assam leh tangwa yajan ki wa ka Byrnihat wei yeini ki karkhana leh da pdiang ki.
Da kyntu u leh ya ki tre truck kiwa napoh ka jylla wa lada ki karkhanaa ymbien ki wow pynkrehkaam namo wow su ya i dor wa T. 7 chi ton chi kilometer wow sñiawbha ki wow pyntip ya ka JAC khnang wow ye ko u leh yeiwa emkaam.
Khaddooh neiliang u Nehemayah da pynche u hajrong i sñiawthooh bakla ki paidbah wa lada ku ka bai kit (Bhara) kamtæ daw ku leh i dor i khyndaw-bilat deiwa ong wa ka bai kit nadooh u snem 2002-03 hadooh kini ki sngi da neh ko kamjooh katwa i bai khyndaw-bilat dang ku bait i wei lada jia wa ku i, ki paidbah ymtoh u pynbaad ki ya ka JAC wei ka sorkar da em ko leh ka Committee wow booh ya i dor yong i khyndaw-bilat.
