Ynne ka sngi da chong bichaar ya ka wi ka mukotduma (No. W.P.(C) 328 of 2020) wa yaleh da u Shanialang Suchen kawa da yaleh pyrchah yaka sorkar Meghalaya wa kiwi kiwi yow pyrchah ya i pynbna paidbah (Public Notice) kawa da pynmih haka 16-10-2020 da ka Meghalaya State Pollution Control Board (MSPCB) heiyatoh wow pynman yaka Public Hearing haka 21 tarik uni u bnai ha pchem ka yung krehkaam u Deputy Commissioner ka East Jaiñtia Hills District ha Khliehriat yow pynman yaka Public Hearing yow tih ya u moochuni ha i thaw wa heh 42.051Ha ha Brishyrnot, East Jaiñtia Hills District da ka M/S Star Cement Meghalaya Limited.
Ya kani ka mukotduma da bichaar da u Justice W. Diengdoh ka Meghalaya High Court heiwa uwa leh yaka mukotduma u Shanialang Suchen da pyrchah u yei pynman ya kani ka Public Hearing kamjooh yeiwa chah du 100 ngut ki bru wow chimbynta ha kani ka Public Hearing kamtæ da kyrpaad u wow pynsangeh yei pynman ya kani ka Public Hearing.
Hawa jubab ya ini, u Advocate General (AG), ka sorkar Meghalaya, u Amit Kumar da pyntip u yaka yung bichaar wa yaka Public Hearing neibynta kani ka jooh ka kaam da pynman haka 19-10-2020 wa haka 30-01-2020 tangwa neidaw wa em ki paidbah wa pyrchah, ym em yoh u Deputy Commissioner ka East Jaiñtia Hills wow pynman yaka ha waroh arsien.
Kamtæ ka Public Hearing kawa daw pynman haka 21 tarik uni u bnai man ko thij katkam ki chithi wa em yaka tarik 18-06-2020 wa ki kyndon wa pynmih haka 14-09-2020 wei deiwa yoh bor naka Ministry of Environment, Forests and Climate Change (MoEF&CC) wei u pynman katkam ki kyndon ka EIA Notification, 2006.
U AG da ong u wa uwa yaleh mukotduma toh u lai chibynta u haka Public Hearing wei wow e lane pynsñiaw yaki kyndon wa pyrchah u ha ka Public Hearing hi. U AG da pyntip u leh hakhmat ka yung bichaar wa lada ki bru wa wan chimbynta em ki palat 100 ngut, daw chah won yaki 100 ngut wow chimbynta ki haka jooh ka sngi ha i jooh i thaw hadien wa dep ki 100 ngut chwa, kamtæ ki bru wa ye u chimbynta ym toh wa chah du 100 ngut donhi.
Kamtæ hadien wa ka yung bichaar da ap da sñiaw ko ya waroh ki nia kiwa da dep wow e chwa da waroh arliang, ka High Court da rai ko wow kyntait yaka mukotduma neidaw wym chem ko ya ka yurim ya kani ka mukotduma.
