Ynne ka 20 tarik da pynkut ya ka esikai chet yaki baam wa tip kam ki Fast Food kawa da pynman ha Jacob Syngkon Training Center (JSTC) kawa em ha ka chnong Madankynsaw-Mowkyndeng, West Jaiñtia Hills District.
Ya kani ka esikai da pynman da ka Jaiñtia Society for Social and Economic Empowerment (JSSEE) lyngba ka Chief Minister Youth Development Scheme (CMYDS) wa wan naka yung krehkaam u DC ka West Jaiñtia Hills District. Da em kamwa 30 ngut ki kynthai wa chynrang kiwa em ha i rta wa nadooh 14 snem hadooh 25 snem kiwa da yoh yei sikai iwa e da ka Matilda Shadap kawa man kawi na kiwa chet wa pawnaam yong kani ka thaaiñ.
Ya kani ka e sikai kawa 5 sngi da sdang nadooh ka 16 tarik uni u bnai heiwa haka sngi wa kut da saam leh ya ki Completion Certificate cha waroh kiwa chah sikai da u Dwik Lamin, DTO ka East Jaiñtia Hills District deiwa emlang u Bud Rimanki Chympa, Executive Director JSSEE wa kiwa pynlai chnong.
Neiliang yong ka JSSEE da e khublei kyrpang ko leh ya u DC ka West Jaiñtia Hills District u Garod LNS Dykes yeiwa da e yarap u lyngba u katai ka Scheme khamtam heiyatoh wa i pynkup bor ya ki khon khynroo khyllood yong kani ka thaain lyngba ki esikai wa boon jait.
