Ka East Jaiñtia Taxi Owner Driver Association (EJTODA) hadien wa da boon palat ki kari ki bru samen wa kamai ha East Jaiñtia Hills, ha ka tayaw wa kut u Naichiphaw da dawa ki na u DTO ka District wow khynra kot yaki kari samen wa leh ya ini i kaam neidaw wa da ktah ko haddooh kattæ kattæ yei yoh i kot yong ki hadooh wym ye de ki wow su yaka bai kot bai sla cha ka yung krehkaam u DTO.
Neiliang u DTO da chimkhia u ya ini i kaam wei pyn haka 5 tarik uni u bnai da sdang wow lai khynra yaki kari ki bru samen deiwa emlang leh ki dkhot ka EJTODA wei ya ki kari wa chah kem wa kamai khlem ki kot ki sla wa biang namo ki Permit da daiñ kuna ya ki T. 10,000 kawi ka kari.
Yow pynchlur leh ya ki paidbah wow wan ki chakhmat, neiliang u DTO da pynbna u wa ya ki Permit u e mynkna cha kiwon kiwon kiwa kwah wow kamai kari.
Neiliang ka EJTODA da lai booddien ko ya kani ka kaam deiwa yachem wa u DTO ynnin ka sngi heiwa da pyntip u cha ka seiñ wa da dep wow yoh kem la 24 tylli ki kari wei neiliang ka seiñ da kyrpaad ko na u DTO wow pteiñ yei khynra kari man-ka-sngi wei da pynchlur ki leh ya kitu kiwa kamai tooh wow wan ki chakhmat katwa dang e mynkna yaki Permit.
Ka seiñ da pyntip ko leh wa u DTO da khana u ka kuna wa da yoh u daiñ da poi ko T. 2,40,000 nadooh ka 5 tarik.
