Hadien wa ka seiñ All Hynniewtrep People United Front (AHPUF) da yoh ujor ko na kiwa chong wa sah haka dong Wahiawchor, Iawmusiang Jowai wa ki paidbah kiwa lai wa na ka sarok wa lai nadien ka yun krehkaam u DC, Jowai kawa tip kam u DC Court to Taxi Stand Road uwa da man uwa da sih bha uwa da lai pait leh daka seiñ haka 23 tarik uni u bnai wei da chem sakhiat wa man u uwa sih bha hadooh wa ki kari khian ym lait de ki u lai u wan.
Kamtæ haka 24 tarik ka seiñ da lai e ko dei thoh cha u Deputy Commissioner ka West Jaiñtia Hills District wa cha u Executive Engineer PWD (Roads) Jowai Central Division, Jowai. Ka seiñ ym em u yoh ko wow yachem wa u Executive Engineer neidaw wym em u ha i thaw krehkaam yong oo, kamtæ da ieh ya iwa da thoh.
Hei yachem won wa u DC, da kular u wow chimkhia ya ini i kaam wei wow yaklam wa ki heh kiwa toh wow pait ya ini i kaam.
Katkam wa yoh yuitp ka seiñ wa ym pu em slem wa dep chna ya uni u sarok uwa man leh u One Way hi-eh, kamtæ uni u sarok ym pu toh por u sih u hadooh katni katni. Kamtæ ka seiñ da ong ko wa da sih u neidaw wa chna khalær u Contractor uwa pynkreh yaka.
Kamtæ ka seiñ da beiñ joor ko ya uni u Contractor wei kamjooh yaki sahep kiwa toh u pait yei chna ya uni u sarok. Wei la dang toh hapoh i por, uni u Contractor dang hap u wow pynchna smat ya uni u sarok wei lada toh i por wow pynchna, toh u thooh laad thooh luti wow leh smat.
Da chna ya uni u sarok yow pynsuk yei lai yei wan kiwa chong wa sah ha kani ka dong ka chnat, kamjooh leh wow pynduna yei sahkut kari ha Iawmusiang tangwa nei sih uni u sarok da sepai ini waroh kamjooh i sepai ka poisa paidbah.
