Shillong: Ki wakreh yong ka Meghalaya Electricity Corporation Limited (MeECL) hapoh ka Coordination Committee wa kynthup ya ki Union wa Association waphær waphær da dawa ki da ka takit Central Bureau of Investigation (CBI) yow chem yei sakhiat hajrong i chah pynbaad kiwa boon khamtam hawa yatoh wa i joor i baam tooh hapoh ka MeECL.
Najrong ini, ki wakreh ka MeECL da maham ki leh wow pyndooh bordiñ (Total Shutdown) hapoh ka jylla waroh kawi wei wow sangeh ya i krehkaam lada neiliang ki bor wa toh u pait ym pynlait ki ya ka tulop ka yong ki ha i por wa biang.
Ka Coordination Committee da pynsñiaw ko leh yei pyrchah wa joor yei thmu yong ka sorkar bei wow ekti pynlai noh ha ki Company yong ki bru samen ya ka MePDCL neibhah wa ini daw wanrah ko ya i doohnong wa khroo ya ka jylla wei khamtam daw ktah bha ko ya ki manyung wa dooh wa duk hawa yatoh wa i bordiñ.
Da yoh wow sakhi wa neiliang yong ki wakreh da yahlang ki da ki spah ngut wow yalang lang hakhmat yong ka pchem ka MeECL kawa em ha Lum Jingshai deilang wa i kdoh lama yong, i rah ya ki Banner, ki Placard kiwa da em ki ktien beiñ wei pyrchah yei thmu ka sorkar wow ekti ya i kaam pynmih bordiñ cha ki Company ki bru samen.
U President ka Coordination Committee u K Chullet da ong u wa hawa em i pynbaad kiwa harukom pyrchah ya ka MeECL khamtam da ki MLA iwa mut wa ye u em iyi iyi cha kylla, kamtæ emkaam wow phah takit da ka CBI khnang wa waroh kiyi kiyi u che lut ki.
Da ong u leh wa kam ki wakreh, ki pyrchah joor ki yei thmu e laad cha ki Company ki bru samen ya i kaam pynmih bordiñ wei dawa ki na ka sorkar wa toh u pynsangeh chi syndon ya ka Standard Bidding Document kawa ka sorkar bei da e ko cha ki jylla neibhah ini ym man ko kamwa dai lilam wei i thmu toh wow pyn yohnong ya ki Company ki bru samen.
Da ong u leh wa kam ki wakreh leh ym jooh yoh tulop ki ha i por wa biang nalor kiwi kiwi ki myntoi wa toh ki u yoh, kamtæ da dawa wa toh u pylnait ya ka tulop ha i por wa biang wei kamjooh leh wow ‘Regularize’ noh ya ki wakreh ‘Contract’ kiwa da kreh da ki boon boon snem.
U Vice President ka Coordination Committee u Arju Dkhar da ong u wa ha ka 5 tarik u Kmaichonglad (Dec) daw em i pyndooh bordiñ ha waroh kawi ka jylla lada ka sorkar ym pynlait ko ya ka tulop ha i por wa biang. “I da chah i ha kini ki 10 snem, kbum hi-eh i ya ki ktien tangwa katni ym elaad de i, ka sorkar toh u pynlait ko syndon yei dawa yong i, lada ym ye ko, daw pynjoor ya i yakhih yong i,” da ong u Dkhar.
Da ong u wa i chim ram yong ka MeECL toh iwa ym em yumut wei toh du wow pynhun ya ki Company ki bru samen wa ya kattu katni kiwa yahkhmat yaki seiñ saiñ pyrthai (Politician).
U Dkhar da booh u leh yei kylli wa cheiwon waroh ka poisa da wiar ko wei tip yeiyi ka sorkar su ko. Da ong wa i lum poisa yong ka MeECL ha ka chi bnai ym duna ko ya ka T. 60 klur katwa ka tulop yong ki wakreh waroh wa kynthup ya kiwi kiwi ki myntoi wa i su ym palat ya T. 30 klur, tæ cheiwon kani ka poisa lai ko wei da toh i por wa ki wakreh u tip ki.
“I ym ye i du wow pait wa ki khon yong i u yap thngan ki, wei lada emkaam, u pyndam i na ka chuki ya kitu kiwa emkti ha ka wow leh ya i wym toh,” da ong u Dkhar.
Da maham leh wa lada neiliang ka sorkar ym ye ko wow su daw pynman leh hadooh i chong chah thngan.
