Pynman ka sorkar yaka MeECL kam ka masi khem dud: Dr. Mukul

Shillong: Uwa yahkhmat ka Congress uwa man leh uwa yahkhmat ka liang pyrchah ha ka jylla, u Dr. Mukul Sangma da khyrwait eh u ya ka sorkar hadien wa ki wakreh ka MeECL da mih ki wow yakhih, deiwa ong wa ki wakreh katai ka chnat ki tip bha ki ya i rukom krehkaam ha katai ka Company sorkar, wei ka sorkar da pynman ko ya ka MeECL du kam ka thaw khem dud.

Da ong u wa kam ka liang pyrchah da pynsñiaw ko boonsien yei tkoh i krehkaam ha katai ka chnat, deiwa klam leh hapoh ka yung dorbar chna aiñ, tangwa ym em ye wow leh iyi iy leh neibhah ya ki kaam buit-tooh da pynwandur ha itæ i rukom da ki bru kiwa em ha i bor wei da kiwa pynkrehkaam leh, wei iwi na i nongmuna toh wow kyrriah kaam ya ki sahep, khamtam ya kitu ki wym ye wow kongngooh katkam wa da phah da kiwa em ha i bor wei da kylliang noh da kiwi ki sahep kiwa kohngooh.

Da ong u wa ka MeECL em ko chiboon ki Scheme wa ki Project neibynta wow pynkhlan ya i krehkaam wow pynpoi ya i bordiñ ha ka jylla, tangwa kamwa man kattæ, ya ka MeECL da pynemkaam kam ha itæ i ka rukom wow man du kam ka masi khem dud, iwa da ktah won ya i yoh i kot ha ka jylla hi waroh kawi.

Hawa yatoh wa i pynkrehkaam ya ka Saubhagya Scheme, u Dr. Mukul da pynbaad u yaka sorkar wa da em chwa i thmu wa cheiwon u e yei kreh, deiwa pynmih ya ki kyndon wa kiwi ki Company ym ye ki wow yoh ya i kaam laitnoh du kawi ka Company kawa da dep thmu chwa.

Related posts

Tang ka aiñ wow yada ya ki kur ki jait, ki um ki wah ym ye ki MDC u chna, khut u K.L. Pariat wow pynthymme noh ki

February 1, 2025

Deiwa em haka Congress yooluti u Saron Paswet wow ye kreh bha neibynta ka Council wa ki paidbah

February 1, 2025

Da ong u wa ka Company kawa da yoh wow pynkrehkaam ya katai ka Scheme da booh ya ki dor wa da pyndooh nong ya ka jylla da ki spah klur kawa toh ka poisa ki paidbah, deiwa pyntip leh wa neibynta uwi u chrot bordiñ wa jrong 9.5 Meter katkam ka Schedule of Rate (SOR) da man ko T. 16500 uwi, katwa ka Shabnam Global Infrastructure Ltd kawa man kawi na ka Company kawa yoh wow pynkreh ya katai ka Scheme ha Khasi wa Jaiñtia Hills da pynku ko ya i dor hadooh T.24176, katwa ha Garo Hills ka Company kawa yoh wow pynkrehkaam toh ka Unicon Enterprise kawa da pynku ya i dor cha ka T.28830 deiwa pynku hadooh 70.59% na ka SOR.

Da ong u wa neibynta wow thung ya ki chrot bordiñ wa 8 Meter, i dor toh T.12795 uwi katkam ka SOR, tangwa ha Khasi Jaintia Hills da pynku hadooh T. 20808 iwa palat hadooh 62.63% wei cha Garo Hills da pynku ha i dor T.19182 iwa man 49.92%.