Shillong: U montri ka chnat i chait i khiah u A.L. Hek ynne ka sngi da wai u yaka Syntung Health Sub Centre ha chnong Syntung kawa em hapoh ka Mawkynrew C&RD Block deiwa emlang u montri ka Agriculture, Sports and Youth Affairs uwa man leh u MLA ka thaaiñ u B. Lyngdoh, u Dr. M.R. Basaiawmoit, DMHO, East Khasi Hills, Dr. A. Lyngdoh, Additional DMHO, East Khasi Hills, u L.T. Tariang, BDO, Mawkynrew C&RD Block, u Robert Pale, Sordar ka Syntung wa kiwi kiwi de.
Hawa e yei klam, u Hek da ong u wa i thmu wow wai yaka Syntung Health Sub Centre toh yow pyntikna wa yei sumaar sukhær da yoh yaki cha ki thaaiñ palatsor khamtam yaki kynthai yow pynbha ki yeiwa myllien ki u baam, u wanrah yei pynsñiawthooh paidbah yei emkaam wow myllieñ yaki kaam wa bha, u pyrkhat manda sdang yaka manyung, u pynduna yei khlaad ki manbei wa kha khon kamjooh ki khon wa dang kha. Da pynchlur u leh yaki paidbah wow chimkabu ya kani ka thaw summaar.
Hachwa ini, u Dr. M.R. Basaiawmoit, DMHO, East Khasi Hills hawa e yei klam yong oo da pyntip u wa ka Syntung Health Sub Centre hapoh ka Jatah PHC daw pynmyntoi ko ya palat 4000 ngut ki bru kiwa chong wa sah ha Syntung, Mawjatap, Siangkhnai, Mawlang wa Nonghulew.
