Ka Meghalaya People’s United Front (MPUF) Khliehriat Circle, East Jaiñtia Hills District, da pynsñiaw ko yei sñiawngooh yaka MeECL wa da ap ko yei kyrpaad yong ka seiñ wow lai pyndait bordiñ ya ki san tylli ki manyung ha Khliehdupon Ladrymbai, East Jaiñtia Hills District.
Ini da wan i hadien i lai kyrpaad ka seiñ hapoh i yahkhmat u President ka Khliehriat Circle u Kyrshan Blah deilang wa ki dkhot cha u Executive Engineer katai ka chnat u H. Yakai ha ka yung krehkaam yong oo ha Moowakhu, East Jaiñtia Hills District wa la ar snem kini ki manyung ym pu em wan wow pyndait yaka bordiñ hadien wa da dep pyndait ya u Meter heiwa haka 28 tarik uni u bnai da wan wow pyndait bordiñ cha kini ki manyung.
Heiyatoh wa ini i yoh bordiñ kini ki san tylli ki manyung, neiliang u Waheh Chnog yong ka Khliehdupon Ladrymbai da e khublei kyrpang wei da pynsñiaw u yei sñiawngooh wa khroo cha ka seiñ MPUF-Khliehriat Circle, wa lyngba i krehchitom yong ka seiñ khamtam ya uwa yahkhmat yong ka wa da ye wow pynyoh bordiñ ya kitai ki yung.
Puræ leh: Ar snem hadien wa wan pyndait Meter ym pu yoh bordiñ ki manyung wa dooh ha Ladrymbai
