Jowai: Ka dorbar chnong Ladthadlaboh da khang pyrchah ko yaki kari, ki thuk thuk wa lai wa wan lyngba u pood u ang yong ka kiwa pyndait Silencer da kiwa ood bha i sur neibhah wa manda kyan ka kari da ktah ko ya kiwa chong chnong hadooh wa khyrngiat ki khonbo khamtam hei miet synyaw wada lyngam.
Ka chong da maham ko leh ya ki kari wa yieñ miet yieñ ke haki thaw wa doom wa kiwi ki thaw kam ha Rymbai Petrol Pump, ki bynta ka Mooralong, ki thaw mar pyrchah ka LIC wa kiwi, neibhah neiwa yoh laad ki bru u yachong, wanrah ko yei wym sñiawsuk sñiaw chngaaiñ.
Da khang leh wow noh jhep næ khyndaw ha u sarok wa lai na yingkieñ Myntdu uwa mih ha Laad College, neibhah wa pynsih ya ki liar wa tooid cha Myntdu, pynsih leh yaki hali hator.
U waheh chnong u L.D. Lakiang da ong u wa neiliang ka chnong chim ko i kitkhlieh hajrong ini, wei lada jia wa chem, ka aiñ em ko yow pyntip cha ka.
Kamtæ da kyrpaad u ya ki paidbah wow chimkhia ki heiyatoh wa kini ki kyndon.
