Jowai: Ka Sohkha Govt. Higher Secondary School, Sohkha neini chakhmat u man chooh chooh ko kawi na ki chlem sikai ha thaaiñn War Jaiñtia kawa em sa ya ka Science Building næ ka yung kyrpang neibynta ki khynnah wa purae ya ki Subject Science.
Yeini da pynsabut hapyrdi ki khon ka chnong Sohkha ha kani ka sngi Pynsin 4 tarik Kmiachonglad heiwa u Lahkmen Rymbui, Minister I/c Education, Home (Police) & Forest chirrup i synranlang u D.P. Wahlang, IAS – Principal Secretary Education, I.T. etc. ka sorkar Meghalaya, kiwa da wan wow wai pyrda ya u mooyurim yong i chna ya kani ka yung.
U Lahkmen Rymbui hawa klam heiyatoh wa i chim ka sorkar wow chna ya ki yungskur ha kylleiñ ki thaw yong ka jylla, da ong u ka sorkar da yaleh ko katwa ye walah u pynjan pynsuk ya ki khynnah skur wei chooh chooh leh neibynta wow pynsuk ya ki khon ka chnong Sohkha wa kiwi ki chnong wa em hajan heiyatoh wow yaleh ya ki MBOSE Exam, da kular u leh wa ha u snem 2022 kani ka chnong u yoh ko ya ka MBOSE Examination Centre.
U D.P. Wahlang hawa klam heiyatoh wa kani sngi da ong u man iwa sñiawsuk wa hadien san snem dawan yoohkjat biang u ha kani ka skur wei wow booh ya uni u mooyurim yow chna ya kani ka yung wa kyrpang neibynta ki khynnah wa purae ha ka Science tæ yooluti u dei wa yakrehlang wa ki bor chnong ki kaam u man ki kiwa lai chakhmat wei la kamon kamon toh u yoh u wai ya kani ka yung hapyrdi ki bnai yong u snem 2022.
