Ha ka sngi 5 tarik uni u bnai, ka Lumpynngad Sports Club da pynkut noh ko ya ka Inter Group Football Tournament 2020 ha chnong Lumpynngad kawa em hapoh Amlarem Sub-Division kawa da sdang nadooh u Thohlakhmi (Feb) tangwa neidaw wa em ka Lockdown da hap wow pyndam yaka.
Ha ka ka yakhun Final da pynman hapyrdi ka Group A pyrchah ya ka Group D heiwa da jop da ka Group D deiwa jop da chi kool kawa thap da u Ferando Pohkyrnu uwa da yoh leh yei naam Best Player. Ya i naam Top Scorer da rah da u Sevarious Rymbai, ya i naam Best Defender da rah da u Rymphang Pohkyrnu wei yei naam Best Goalkeeper da rah da u Dibormi Amrynsong wei da e leh yei khusnam wa kyrpang cha u Ebenezer Pohshna kam uwa yaleh wa khian rta dooh namo u Youngest Player.
Ha kani ka sngi da khut sñiawbha ya u General Secretary ka seiñbei ka JSU u Treiborlang R Suchen wow man kam u kongsan, u General Secretary ka War Jaiñtia Circle u Kerrydiam Lamin kam u symbood kongsan deiwa emlang u Environment Secretary u Tiphimi Rymbai, u Waheh Chnong u Sukmon Swer wa u Sports Secretary ka Club u Royalty Rymbai.
U kongsan ha kani ka lympung da pynchlur u ya kiwa yalehke wow chimkhia ki ya kani ka kaam yalehbol neidaw wa ka thaaiñ War Jaiñtia da sai ko boon ki khloor yalehke kam u Phrangki Buam uwa da poi chadooh ka lympung ISL ka lympung yalehke wa heh dooh ha ka ri India.
