Shillong: U President ka Khasi Students Union (KSU), u Lambokstarwell Marngar da ong u wa ka KSU ym kieñ ko da ki suloi tangwa da i snam yow sait yei eh yong ka ri wa ka jaitbru, wa ki dkhot ka seiñ ym toh ki lehnoh wow thombor ya kiwi tangwa ki lehnoh wow yakhun ya i eh wow yada ya ka jaitbru. Ini i klam yong uwa yahkhmat ka KSU toh hadien wa mih i dawa na ki kattu katni ki kynhun wow kheiñ yaka KSU kam ka seiñ wa man pyrchah yaka aiñ.
Ka Khasi Students Union (KSU) ynne ka 7 tarik da pynman ko ya ka kynmoo warom ya ka lyngkhooh sngi yap wa 26 yong u President warim ka seiñ, u Bull N Lyngdoh. Ya ini i kynmoo warom da pynman ha Malki hakhmat u mot sahnaam yong oo deiwa booh syntu heiwa da emlang leh ki dkhot ka KSU, kiwa ha yung ha sem u Bull Lyngdoh wa ki paralok.
Hawa klam haka yalang, u President ka KSU, u Lambokstarwell Marngar da ong u wa ki bru chlur ym jooh yap ki, heiwa ki kaam yong ki, ki im ki wei klam bru ki, wei da ong u wa kiwa yahkhmat wa em yei kitkhlieh wow yada wei wow yaleh pyrchah ya ki bor kiwa na baar kiwa da pyrchang wow chim yabor ya i khyndaw i chyiap wa ka synchar ka khadar.
Da ong uwa ka Inner Line Permit toh ka phang nadooh ki por yong u Bull, hanla uni u rangbah da khlaad noh u, ka jaitbru ym pu yoh ko wow khait ya u soh i jop, wei neiliang ka sorkar jylla ha u Kmaichonglad (Dec), 2019 da mynjur ko ya ka Resolution tangwa ka sorkar India ym pu dep ko wow puræ hadooh katni.
U President ka KSU da pynbna u leh wa ka seiñ daw lai ko chakhmat wow pynjoor ya i dawa ILP deiwa sdang u thang ya ki dur bula u Prime Minister wa u Home Minister ha man ki District wei ha ka 17 tarik, daw pynman ya kani ka jooh ka yakhih ha nongbah Shillong.
Ha kani ka sngi neiliang ka KSU da saam ko leh ya ki khusnam cha kiwa jop ha ka yakob thoh Poetry.
