Ka Meghalaya Tribal Teachers’ Association(MeTTA), ka North-Eastern Hill University Teachers’ Association(NEHUTA) waka Meghalaya Confederation for Academic Welfare (MeCAW) da pynsñiaw ki yei sñiawsih wa i pynyinsur yei man kam u Caretaker Vice-Chancellor u Prof. S.K.Srivastava ha NEHU uwa da pynbaad ki le seiñ wa pteiñ u wow pynemkaam bakla yei kyrdan yong oo hadooh wow pynkylla (Amend) yaka kyndon wa emkaam yong ka Central University iwa ye wow pynjrong chooh yei por yong oo.
Kamtæ da ong wa katni i thooh ya u VC wa thymme da lai i chakhmat wei ini i leh embor wow tyrwa u pynkylla yaka University Statute 2(A) (2) iwa yatoh wow pynyinsur yei man kam u VC toh hadooh 1 snem lane hadooh wa yoh VC thymme wei ini toh yow yoh u yei myntoi samen.
Da ong leh wa ini i pynkylla yaka aiñ ym toh wow ye u leh da u VC wa man kam uwa pait hi-eh namo u Caretaker wa toh u pait hi-eh yei yung krehkaam u ym toh wow pynkylla yaka aiñ.
Da ong wa ki daw wa e u Prof.S.K.Srivastava hawa tyrwa yow pynkylla yaka aiñ toh deiwa nujor yaka NEHU wa kiwi ki Central University. Kamtæ da kylli wa lada u VC uwa da dep wow kut i por ye u wow chim ya kam kani ka rai.
Kamtæ da pyrchah ya ini i tyrwa wa da wanrah da u Prof. S.K.Srivastava wei heijooh i por daw li rah ya ini cha ki bor wa haneiñ yow khang ya kini ki kaam wa leh da u Caretaker VC.
