Jowai: U Chief Forest Officer (CFO) ka JHADC u F.W. Blah hei synraan lang kiwi won ki wakreh ka Council ynne ka sngi da hiar ki cha Madan Kya wa em harood ka wah Myntang ka bynta khappood hapyrdi ka chnong Saba waka chnong Mushrot, West Jaiñtia Hills District wei da pynman leh ka yalang ki arliang neibynta wow wanrah i ya sñiawthooh yumut hapyrdi ka chnong Saba wa ki warep ka chnong Mooshrot ki warep wa riang ha kani ka thaw neidaw wa mih i kulmar, i awri awra.
Haka yalang ki arliang, da emlang u Dolloi ka Elaka Shilliang Myntang u K. Sariang, u Dolloi ka Elaka Raliang u C. Lyngdoh, ki waheh chnong na ki arliang chnong nalor kiwa chong chnong ka Saba wa ki paaid warep ka chnong Mooshrot.
Hei yaklam wa u F.W. Blah, da khana u wa da wan hiar ki neidaw wa neiliang ka chnong Saba da dep Register ko ya kani ka khloo lyngba ka JHADC, wei hapoh kani ka khloo da em i rep riang ki warep naka chnong Mooshrot, iwa da mih kulmar wei i ya pynthut hapyrdi ki arliang.
“I wan yong i toh yow pynsuk wei kani dang toh ka sien nyngkong wow wan hiar i. Katkam i yaklam da ong yaki warep ka Mooshrot wow pynkhooid ki jar u pood wei daw wan sylli biang i, kamjooh kiyi wa haap hapoh ka Map yong ka chnong Saba khnang yow ye wanrah yei suk, neibhah kani ka thaw haap ko hapoh ka Elaka Shilliang Myntang,” ong u F.W. Blah.
Chooh chooh pyntip u wa ini dang toh i sdang donhi wow wan hiar takit wei daw lai thij pa thij, wei yeini daw pyntip chaka Executive Committee ka JHADC neibynta u leh ko yeiwa emkaam.
Hei yaklam wa ki warep ka chnong Mooshrot, khana ki wa nadooh nachwa da rep da riang ki ha kani ka khloo wei wym em leh iwon iwon i pynthut, tangwa nadooh u snem 2014 ter ter hadien waka Saba da yoh ko yaka Map yong u pood u ang ka chnong yong ka, da sdang ki wow khanglaad ya ki warep ka Mooshrot u rep ha katai ka khloo nalor wa pteiñ ki leh u pynjæd pynsih yaki mar rep kiwa rep ka chnong Mooshrot.
“I sakhiat hi hanla ka thaw haap ko haka chnong yong ki leh, wym toh won u khanglaad ya ki warep neibhah em i ka hok thaw rep ha u pood yong ki. La kyruiñ kam cha ki chnong sor leh hanla katu ka thaw hap ko hapoh u pood u ang yong kawon kawon ka chnong leh, boon kiwi won ki bru na kylleiñ ki chnong leh em hok ki hapoh yong ka lyngba i em thaw, em yung em sem wa kiwi, wei kani leh wan ko ha ka jooh ka yurim,” ong u S. Tang u warep naka chnong Mooshrot.
Hawa kylli won wa em hi ki mo yaki kot pynsakhiat yei hok kam ki warep, khana ki em hi kiwa em dostabit em won ki wym em.
Neiliang ka chnong Saba won hawa klam cha kiwa thoh khubor khana ki wa i wan rep yabor ki Mooshrot cha chilliang ka wah Myntang da sdang ko nadooh ki por wa kani ka thaw hap ko hei pait ka chnong Mukroh, kamtæ ha u 2001 hadien wa ka Mukroh da bhah ko ya u pood u ang lyngba i bor u Dolloi da haap noh ko hapoh i pait ka chnong Saba.
“Heiyatoh wa u pood u ang, neiliang ka JHADC leh da dep e ko cha i yaka Map waka Registration ha u snem 2013, wei neitæ i daw ym kwah i wa ya u pood u ang ka chnong u wan kam da ki bru samen, tangwa toh u yoh bynta da ki paaid ka chnong hi wow rep wow riang,” ong u Roming Suchiang, Ex-Waheh Chnong Saba.
Chooh chooh ong u kam kiwa chong chnong wa sah haka thaaiñ khappood Assam, da chah khanglaad ki wow li rep cha i thaw wa jooh rep ki, te lada ki Mooshrot yaknieh ki, kiwa chong chnong ka Saba daw yap thngan neidaw wym yoh thaw rep.
Hajrong kani ka yurim da kyntu joor ki yaki bor ka JHADC wow smat pynbait noh katkam ka luti, wei u bood ryntih leh yaki kyndon aiñ ka Council katkam ki kot ki sla khlem da ñiaw chiliang, neibynta u pynyoh yei hok ka chnong.
Heijooh i por ong u wa nachwa ki Mooshrot ha chwa u rep, paan bor ki naka chnong, tangwa katni won ym em de pyntip ki.
