Jowai: Haka yalang wa da khut pynman daka Synjuk ki Waheh Chnong Jowai ynnin ka sngi ha yung dorbar ka Dulong, Jowai hei yahkhmat u President u A. Ñiangti, u General Secretary u L.D. Lakiang wa kiwi ki dkhot heiyatoh i lai luti yong ki hajrong i kynriah yaka PWD North Division, nalor wow ya pyrkhat heiyatoh wa ki kaam (Project) wa sahteiñ ha Jowai kam ka umbam umdih, ka Iawmusiang wa kiwi ki kaam, neiliang ki khro pyrkhat ka chnong Jowai naki dong waphær waphær leh da wan ya chimbynta ki wow pachat yumut.
Kiwa yeiñ klam da pynsñiaw ki ya ki yumut waphær waphær wa iyi wa emkaam u leh neini chakhmat neibynta u pynwan dur yaka chnong Jowai waroh kawi heiyatoh waka roi ka paar.
Lyngba kani ka yalang ki dkhot yong ka Synjuk Waheh Chnong Jowai, da booh hei thoh yaki yumut waphær waphær wada e da ki khroo pyrkhat, heiwa neiliang ka Synjuk won leh daw chong pyrkhat ko yei e buit wada yoh yow ye ko chim yaka rai wa emkaam u lai luti neini chakhmat.
