Ka seiñ Jaiñtia Students’ Movement (JSM) da ong ko wa ym sñiaw yahaap ko ya ka SOP wa da pynmih ka sorkar jylla wa ong wa khang ko u lai Carol heipor Christmas wa i baam-doh kut snem.
Ka seiñ da dawa ko na ka sorkar wow pynbait thymme yeini deiwa ong wa lada ka sorkar chah ko ya kiwi ki niam wow lai paidbah namo yaki yadaw masi wa jooh man man-ka-sngi, da ki spah ngut ki bru wa wan cha ki thaw yathong neiyi i daw won wa khang du ya ka Christmas Carol wa ka baam-doh kut snem.
Da ong ka seiñ wa ya ki baar jylla da chah wow wan uiñke, ki yaw ki haat da wai lut ki, ki thaw puræ, ki thaw pait phlim wa kiwi kiwi da chah katwa kamtæ da dawa ko na ka sorkar wow chah wow lai Carol wa ka baam-doh kut snem.
U Working President yong ka JSM- Western Region, u Suni Bareh da ong u wow pynlait noh ya ini i khang iwa khlem yurim, neiliang ka seiñ daw pynman ko ka da ka Rally wa ki kaam wa phylla hapoh District waroh kawi.
